Dili Luxu Dili Lixu

Lixu ne'ebe hafutar liuron Kapital Nasaun Timor Leste (13/3) Lixu ne'ebe hafutar liuron Kapital Nasaun Timor Leste (13/3) Foto suplai

 Tempotimor (Dili) - Inundasaun ne'ebé akontese iha kapitál Dili, Sesta (13/3), nu'udar inundasaun ne'ebé boot liu iha era ukun rasik-aan.

 Antes ne'e, mosu duni inundasaun hanesan ne'e maibé la boot liu horisehik. 

Fatin sira ne'ebé antes ne'e potensia risku bee sa'e identifikadu ona hanesan Maloa ba Ai-Tarak Laran, Bairru-Pité, Vila-Verde, Kaikoli, Kolmera (Alfandega oin) no Audian. 

Maibé akontesimentu iha Sesta (13/3), la'ós de'it ona fatin risku sira ne'e, maibé kuaze fatin hotu afetadu iha kapita Nasaun nian sofre. 

“Ponte entre Bekuse ho Taibese hari’i ho orsamentu bo’ot milaun lubuk maibe konstrusaun ponte ne’e la ho kuidadu hamosu inundasaun. Dezastre ida hodiseik ne'e kombinasaun entre Natureza ho Human Error (ema nia sala) maka rai henek taka no ai be’e lori mai sulan netik entaun be’e naksalin ba parte Taibese no Bekuse hodi halo be’e tama populasaun nia uma,” dehan Atino Junior, Komunidade ida ne’ebe nia uma hetan estragus. 

Nia haktuir, “Governu anterior gasta osan bo’ot ba hari’i ponte ne’e maibe la ho kualidade, nune’e rezulta inundasaun.” 

“Ita hare Governu uluk deve osan husi nasaun seluk mak halo esgotu sira iha Dili laran maibe ninia rezultadu hamosu inundasaun,” nia lamenta. 

Hafoin akontesimentu ne'e tuir observasaun www.tempotimor.com, kapitál Dili ne'ebé durante ne'e luxu tuir padraun Timor nian, nakfilak sai fali fatin lixu. 

Tahu no foer naklekar iha dalan. Dili laran nakonu ho suar rai rahun.

Dezde dadeer de'it kuaze ema barak iha fatin-fatin komesa hamoos ona uma, tanba nakonu ho tahu ho fo'er. 

Atividade negósiu sira liuliu iha área Audian nian barak sei taka tanba tenke hamoos fatin ne'ebé nakonu ho tahu. 

Inundasaun iha Dili la'ós foin akontese, iha kuaze tinan-tinan sempre akontese maibé governu ne'ebé troka malu kada periodu seidauk hetan solusaun konkreta ba problema ne'e. 

Dala barak liu lider sira foka liu ba hamoos fo'er. Dala ruma sira tuun direta hodi hatudu katak só sira mak hanoin tebes loos povu ida ne'e. 

Maibé lider sira-nia asaun tuun ba hamoos fo'er la'ós solusaun ba problema. Solusaun maka oinsa buka meius atu bee bele suli tuir ninia fatin hodi hamenus risku bee hoban beibeik kapitál Dili. 

Bainhira governu laiha polítika sertu maka situasaun hanesan ne'e iha futuru sei kontinua akontese ba beibeik. (*

Rate this item
(0 votes)
Last modified on Saturday, 14 March 2020 15:56
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.