Xefe Ekipa mobilizasaun komunidade, Agusta Amaral Lopes hatete, atividade ne'e sei la'o tama sai iha postu administrativu 5 iha munisipiu Dili.
"Ita-nia atividade ohin hala'o iha postu hotu, esklui mak Atauru tanba ne'e ekipa fahe hotu ona entaun karreta sira fahe ba postu-administrativu hamutuk rua ou tolu, nune'e ita-nia hakarak suku sira ne'e tama hotu," dehan nia iha edifisiu Ministeriu Saude Kaikoli, Dili, Segunda (30/3).
Liu husi atividade ne'e, nia dehan, ekipa sei fahe informasaun ba komunidade sira oinsa atu prevene Covid-19 iha Timor-Leste.
Ekipa ne'e kompostu husi Komisaun Direitu Labarik, Ministériu Estatal, Ministeriu Edukasaun, inklui parseiru sira hanesan CVTL, Merystopes, Care Internasional, Mersycorps, Plan Internasional no UNICEF.
Xefe ekipa ne'e hatete, tuir planu atividade ne'e hala'o durante loron ida de'it.
Ekipa mobilizasaun komunidade ne'e hahú sira-nia iha tuku 09:00 no tuir planu sei remata iha tuku 17:30.