Xefe Suku Fatuhada Marcelino Soares informa, nia parte fahe ona formulariu ba familia sira iha Suku Fatuhada hodi antisipa planu governu fó subsidiu.
"Ha'u la hatene Xefe Suku sira seluk, maibé tuir Xefe Suku Fatuhada nia vizaun haree buat ne'e tenke akontese, tanba nasaun sira seluk ninia kuandu akontese komunidade la sai ona, estadu ka Xefe Suku tuun ba terenu identifika ninia ema, entaun Xefe Suku prepara ona lista sira ne'e par governu munda mai, husu, ita hein intrega hodi implementa," dehan nia ba www.tempotimor.com iha ninia hela fatin, Fatuhada-Dili, Sesta (10/04).
Nia hatete, seidauk iha orientasaun husi governu ba rejistu, maibé nu'udar inisiativa hodi halo antisipasaun.
"Razaun seluk halo rejistrasaun ba fixa familia ne'e la'os atu antisipa de'it ba subsidiu $100 dolar ne'e, maibé atu antisipa mós ba karik mosu dezastre naturais ruma, entaun prepara antes par kuandu akontese governu halo apoiu umanitaria parte husi suku mós prepara ona," nia hatete.
Iha fatin hanesan, Komunidade Aldei 05 Filomena da Silva da Costa dehan, nia trata dokumentu ne'e hodi hein planu governu oferese subsidiu.
"Ita-nia governu atu fó $100 dollar kada uma-kain, tanba ne'e mak ohin ami mai trata hela dokumentus hirak ne'e", dehan nia.