Tuir informasaun, estudante sira tuir hela prosesu aprendizajen derepente polisia sira tiru gas lagrimojeniu tama area eskola nian.

"Gas tama ami-nia matan, depois ami halai sai tiru tan gas hodi kona-ba ha’u nia ain. Tanba moras ha’u tanis polísia dehan nonok, depois fai tan stick iha ha’u-nia knosen sorin loos to’o metan”, dehan estudante Leonardina Laqusá da Costa Pinto, ne'ebe sai vitima ba hahalok bruralizmu polisia nian.

Estudante ne’e rasik la hatene problema saida, derepente de’it polísia tiru gas arbiru, polísia la husu loos mestri sira, maibé sira tiru de’it.

Entretantu, Diretór Eskola Sekundária Jerál 10 Dezembru, Komoro, Domingos Savio Gusmão hatete iha eskola ne'e laiha problema ruma.

Bainhira estudante sira intervalu, sira tama fali aula la kleur polísia tiru gas.

“Ami sira ne’ebé lahatene buat ida, ami mak sai fali vítima, tanba polísia sira tiru gas mai tama hotu ami-nia matan to’o ami haree mós la di’ak”, tenik nia.

Diretor ne’e, apoiu atuasaun polísia nian, maibé tenke hatudu profesionalizmu, nune'e labele halo servisu hanesan preman.

Observasaun jornalista tempotimor.com iha terenu, Polísia Eskuadra Komoro konsege kapturra estudante kuaze limanulu resin hodi presta deklarasaun, maibé sira deklara la halo problema neen tuda kareta polísia nian.