Koordenadór Forsa-Tarefa ba Prevensaun no Mitigasaun Surtu Covid-19, Rui Maria de Araújo informa, hafoin deteta kazu foun rua iha Bairru BTN-2, Tasi-tolu Postu-administrativu Don Aleixo, Munisípiu Dili iha loron 07 fulan-Marsu tinan 2021, ekipa konjunta saúde buka tuir, ema sira ne'ebé halo kontaktu besik, no hetan tan kazu foun na'in-neen (6) nomós ida husi área Bebonuk, iha loron segunda (08/03).
"Husi ezersisiu ida ne'e, ohin ita deteta tan, kazu na'in 6, husi kontaktu besik ba kazu ida, iha sorin seluk, husi mós ezersisiu teste Screemin ne'ebé halo ba grupu risku balun deteta tan kazu ida iha área Bebonuk", dehan nia liuhusi konferénsia Impresnsa iha Sala Situasaun Sentru-Integradu Jestaun Krize, CCD, segunda (08/03).
Nune'e, iha loron 08 fulan-Marsu tinan ne’e, ekipa konjunta saúde rekolla ona amostra ba ema sira ne'ebé kontaktu besik iha Bebonuk hamutuk ema na'in 55.
Husi totál kazu konfirmadu Covid-19 dadaun iha Timor-Leste hamutuk na'in 34 ne’ebé tama iha sala Izolamentu Vera Cruz.(*)
