Iha loron kuarta (07/04), maizoumenus tuku 11:00, líder istóriku, Mari Alkatiri lori ona sasán bázika sira tula ho karreta modelu Hilux rua hodi fahe ba komúnidade afeitadu inundasaun iha Tasitolu, bairo João Paulo II, aldeia 12 Outubru, Suku Komoro, Postu-administrativu Don Aleixo, Munisípiu Dili.
Komúnidade ne'ebé organiza família afeitadu sira iha bairo João Paulo II, Joanico da Costa hatete, hafoin akontese inundasaun, foin mak hetan apoiu nesesidade bázika balun husi eis-primeiru Ministru, Mari Alkatiri.
“Sim, ohin (Mari Alkatiri) ajuda fós, supermi, no lona para ami bele augenta, tanba inundasaun ne'e kadavez semana ida ou rua mak foin bele maran”, dehan nia iha tasi tolu, kuarta (07/04).
Alende apoiu husi Mari Alkatiri, seidauk hetan apoiu ruma husi parte Governu, sosiedade sivíl inklui mos sira seluk.
"Ami seidauk iha ajuda husi parte estadu, tanba dala barak parte estadu no kompaña sira mai ladun hatene ami iha parte ida ne'e”, nia afirma
To'o agora, parte autóridade suku seidauk rekolla dadus komúnidade ne’ebé afetadu iha área refere.
"Áte agora sidauk iha xefe suku ka autóridade lokál hakat to'o mai atu rejista komúnidade rasik, agora dadauk ami komúnidade rasik organiza malu hodi foti desizaun katak, aprezenta ba kompaña sira ne'ebé mai hamutuk ho sira koordenasaun iha João Paulo iha foho leten”, dehan nia.(*)
