Segundu komandante Componente Apoiu Serviço (CAS), Major Deolindo da Costa Amaral "Sarai"dehan, atividade perfurasaun bee ne'ebé membru sira halao ne'e, hetan apoiu husi forsa DCP Australia nian, tanba Falintil FDTL rasik seidauk iha ekipamentu rasik.
"Bee ne'e, tanba FDTL nia mákina laiha. Mákina purifikasaun de água ne'e laiha, maibé mina, mákina husi ita nia maluk sira Australianu sira husi DCP maka ajuda ita nia forsa sira mai halo servisu de'it", hatete Segundu Komandante CAS ne'e, bainhira akompaña hela membru sira taes bee-moos iha aldeia Bekusi Klaran, sexta (09/04/2021).
Nia esplika, prosesu taes bee nee, kanaliza husi bee merak sira neebé tun husi mota, hatama ba mákina laran, hafoin prosesa nia sai bee ne'ebé moos ho kualidade hodi uza ba konsumu.
"Bee ne'e, loke ona no estila tiha ona iha ne'e, para populasaun sira besik iha ne'e bele kuru de'it. Mais ba fali hanesan populasaun dook sira ne'e bee la to'o, tanba ne'e nia kapasidade ki'ik liu. Ne'ebé ha'u nia membru CAS sira mai ho DCP Australianu sira lori mákina ne'e mai tidin iha ne'e para estila bee halo mós tiha para populasaun besik sira iha ne'e bele uza", hatete nia.
Nia husu ba komunidade sira atu uza bee ho didi'ak, nune'e komunidade sira hotu-hotu bele asesu ba bee-moos.
Iha fatin hanesan, Kapitaun, Douglas Menzies, nuudár Asesór iha CAS-Falintil FDTL dehan, Australia nia Programa Koperasaun Defeza (DCP) servisu hela atu apoia F-FDTL hanesan parte Governu Timor-Leste nia resposta ba emerjensia ne'e.
Nia hatete, mákina bee mos ne'e - DCP fó ekipamentu ho treinamentu ba F-FDTL ba tinan balu ona, hodi ajuda membru sira atu nafatin dezenvolve sira-nia kapasidade hanesan forsa profesionál.
"Makina ne'e uza teknolójia atu provide bee mós durante situasaun oioin, inklui hanesan apoiu depois dizastre naturais, ne'ebé tarefa importante ba forsa", dehan Kapitaun Menzies.
Nia dehan, triste loos bainhira haree Timoroan inklui nia belun sira iha susar tanba kauza husi bee sae, nia lori forsa DCP nia naran, hato'o kondolensia bo'ot ba ema ne'ebe terus hela.
Maibé, iha sorin seluk nia mós sente haksolok tanba haree F-FDTL nia Enjeñaria sira husi Componente Apoiu Serciço (CAS) hetan susesu ho sistema ne'e, atu hatudu sira-nia abilidade ho ajuda ema iha Becusse.(*)
