Ai-han báziku sira ne'e kompostu husi, fós, supermie, roupa, kolxaun ne'ebé transporta iha kamioneta hamutuk haat hodi halo distribuisaun ba vítima sira ne'ebé afetadu ba inundasaun iha Lagoa 1, Tasitolu.

Koordenadór Posku Bee-Leten iha área Joăo Paulo II-Tasitolu, Joanico Sebastiăo da Costa informa, totál vitíma ba inundasaun hamutuk uma-kain 47 ho membru komunidade hamutuk 227, labarik 34, inan-isin-rua iha na'in tolu.

Hafoin akontese inundasaun, iha komunidade balu mak simu ona apoiu báziku husi ekipa voluntáriu sira, inklui líder nasionál Kay Rala Xanana rasik ne'ebé tulun ona sira hodi hakmaan sira-nia susar iha tempu balu.

"Husi grupu voluntáriu sira ajuda ona, maibé parte estadu to'o oras ne'e seidauk. Maibé, husu liuliu ba governu atu apoiu lona, tanba ami-nia sasán uma-laran hotu la salva”, dehan nia iha Aldeia 12 Outubru, Suku komoro, Postu administrativu Dom Aleixo, Munisípiu Dili, sesta (09/04).

Agradese mós ba apoiu báziku sira ne'ebé tulun husi líder karismátiku Kay Rala Xanan nian, tanba bele sustenta netik moris ba tempu balu nia laran.

Maske nune'e, tuir nia apoiu hirak ne'e ba sira, seidauk natoon, tanba durante akontese inundasaun, sira-nia uma-laran, sasán barak mak estragu totál.

Tuir observasaun www.tempotimor.com iha terrenu nota, molok Xanana fila husi vítima inundasaun sira iha lagoa 1, iha dalan, grupu husi komunidade inklui labarik sira trava Xanana iha estrada klaran, kaer ho brosxura ho kuadru ne'ebé hakerek ho liafuan "ami presiza ajuda".

Hafoin trava, líder nasionál ne'e mós tun husi nia karreta laran ba hakuak labarik no foinsa'e sira hodi rona no haree direta sira-nia preukupasaun.(*)