Observasaun ne’ebé halo iha loron 18 fulan-abril tinan 2021, PM Tau akompañadu husi Ministru Obras Públika, Salvador Pires, kontinua hala’o observasaun ba serbisu emerjénsia normalizasaun estrada no mota sira ne’ebé hetan estragu husi rai monu no mota sobu kauza husi siklone tropikál Seroja ne’ebé atinje Timor-Leste.

Iha observasaun ne’e, kompaña sira kontinua esforsu halo normalizasaun ba moru sustentasaun mota ne’ebé monu no suru sés sedimentasaun ne’ebé taka estrada iha Beduku nian ba to’o iha Mota Ulun.

Dadaun ne’e, transporte sira hahú ona viajen Dili Aileu-Dili, maibé tenke halai ho kuidadu tanba rai tahu no dodok.

Hafoin observasaun, Xefe Governu hatete Governu nia foku iha situasaun emerjénsia ne’e, oinsá mak halo uluk atendimentu ba populasaun sira ne’ebé afetadu.
“Halo serbisu emerjénsia hodi normaliza estrada, moru sustentasaun mota, riin eletrisidade no kanu bee-moos ne’ebé destruídu atubele la’o normal filafali”, dehan Taur.

Enkuantu Governu prepara Komisaun Tékniku ida hodi halo hela planu rekonstrusaun ba infraestrutura sira ne’ebé naksobu mediu no longo praju.

Aleinde ne’e Xefe Governu ne’ebé hetan mós akompañamentu husi Prezidente BTL,ep, no EDTL,ep, hala’o mós observasaun ba tore eletrisidade ne’ebé dadaun ne’e iha perigu laran.

Tanba rai sorin-sorin monu maka’as iha Beduku foho lolon, inklui riin eletrisidade ne’ebé mak rai hakoi, no kanu distribuisaun bee mai kapitál Dili ne’ebé kotu iha área Mota Ulun nian no mos Eskola Primáriu Kasnafar-Dare. (*)