“Ha'u mai iha ne'e ho governu nia naran husu ba hothotu iha postu Metinaro, liliu lideransa komunitáriu sira, Xefe aldeia, joven sira no entidade hotuhotu, atu ita apoia malu, hodi halo kooperasaun di'ak ho parte tékniku sira para bele Instala sistema DTMT ne'e hodi di’ak”, dehan Ministru Francisco Jerónimo iha Postu Metinaro, segunda (02/08).
Tanba instalasaun sistema ne’ebé halo Governu lakohi mosu dezentendimentu bainhira ekipa tékniku sira hala’o servisu, maibé buka atu koopera malu.
“Ami lakohi katak bainhira to’o mai, ita hamosu fali dezentendimentu ba montajen sira ne'e, dalabarak ita hakarak maibé to’o tiha mai, ita hahú foti kestaun ba ida ne'e ba ida ne'ebá”, afirma nia.
Tanba ne'e ko’alia ho komunidade no entidades hotu iha postu Metinaru atu intende didi’ak programa instalasaun ba sistema DTMT ne'e di'ak ba komunidade sira atubele asesu informasaun ho di'ak iha baze to’o iha nível nasionál .
“Husu ita-boot sira atu intende katak ida ne'e di'ak ba ita-nia komúnidade sira, tanba komunidade presiza informasaun no asesu ba informasaun qual quer de'it la presiza hasai kustu tanba ne'e ami mai ko’alia ho ita-boot sira antes mai halo instalasaun”, esplika Ministru.
Bainhira tempu implememtasuan mosu dezentendimentu, governu sei desiza hodi hasai fali no muda fali ba fatin sira seluk ne'ebé mak komunidade kolabora.
Iha fatin hanesan Administradór Postu Administrativu Metinaru, Fausto Soares Dias, promote sei laiha dezentendimentu ba instalasaun Sistema DTMT ne'e tanba ne'e di'ak ba komunidade sira hodi asesu ba informasaun.
“Sei laiha dezentendimentu, no fiar buat hotu sei la'o ho di'ak, tanba ida ne'e la'ós di'ak ba lideransa sira maibé ne'e di'ak ba komunidade sira atu sira bele asesu informasaun iha rai laran”, dehan nia. (*)