“Laiha estatístika ne’ebé bele hatudu sira nia servisu, maibé balun servisu ona, iha balun mós seidauk hetan servisu. Maibé ita garante katak ho sira nia kualifikasaun sira bele hetan servisu no bele mós kria kampu servisu ba sira-nia aan no ba ema seluk”, dehan Reitór UNTL iha Centro Convenção Dili (CCD), Segunda (10/12).
Iha fatin hanesan, graduadu Hendra Manafe, husi Fakuldade Medisina Siénsia Saúde, sente kontente tanba bele termina ona estudu iha UNTL no tempu ona atu serbí ba sosiedade liu husi área saúde nian.
“Atu hetan susesu la'ós buat ne’ebé fasil, tenke liuhusi dalan ne’ebé naruk, nune’e tenke estuda maka’as no servisu hamutuk ho dosente sira hodi bele termina estudu ida ne’e”, dehan nia.
Graduadu sira ne’ebé hetan graduasaun ne’e mai husi Fakuldade Edukasaun Arte no Umanidade (FEAH), Fakuldade Ekonomia no Jestaun (FEJ), Fakuldade Siénsia Sosiais (FSS), Fakuldade Direitu (FD), Fakuldade Medisina Siénsia no Saúde (FMSS), Fakuldade Filozofia (FF), Fakuldade Agrikultura (FA), Fakuldade Enjeñaria Siénsia no Teknolojia (FEST), inklui mestradu, pos-graduasaun no peskiza.