Igreja Katolika Deside Laiha Misa Paskal iha Tinan ne'e

Arcebispo Dom Dom Virgílio do Carmo da Silva SDB Arcebispo Dom Dom Virgílio do Carmo da Silva SDB Foto Suplai

Tempotimor (Dili)-Ameasa husi Corona Virus Deasses 2019 (Covid-19) ne'ebé iha ona matan laran obriga parte igreja Katolika Timor Leste hodi foti desizaun atu hapara atividade misa paskal iha igreja sira iha Timor laran tomak.

Parte igreja Katolika foti desizaun ida ne'e liu husi Konferensia Episkopal Timorense (CET). Iha enkontru refere, hasai mós Dekretu Papal kona-ba Covid-19 ne'ebé asina Bispu Dioseze Baukau no Sekretáriu Jerál  CET, Don Basílio do Nascimento, Arsebispu Dili no Pro-Prezidente CET, Don Virgílio do Carmo da Silva, SDB, no Bispu Dioseze Maliana no Prezidente CET, Don Norberto do Amaral.

"Iha tempu susar hanesan ne’e, ita halo buat ne'ebé ita bele; buat ne'ebé ita labele, ita husik iha Maromak nia liman no husu ba sidadaun ida-idak atu hola responsabilidade ba povu hotu-hotu nia di'ak," deklara Don Virgílio, iha Sekretariadu CET, Balide, Dili.

Don Virgilio dehan, Covid-19 sai nu'udar pandemia ida ne'ebé daet ona ba mundu no virus ne'e ho fasil daet bainhira ema barak halibur hamutuk.

Virus ne'e rasik, Arsebispu Dili ne'e dehan, tama ona iha Timor-Leste, tan ne'e, CET deside hodi hapara misa paskal iha tinan ida ne'e.

"Conferência Episcopal Timorense hakarak fó hanoin fali ba sarani sira hotu katak loos duni Amu Bispu sira iha responsabilidade ba fiar nian, maibé Amu Bispu sira iha mós responsabilidade ba vida ema hotu nian, liu-liu ba sarani Katólika iha Timor-Leste", dehan Arsebispu ne'e.

Tanba ne'e, Don Virgilio hatutan, sasukat la'ós fiar forte, fiar fraku ka fiar laiha, maibé sasukat ne’e mak povu Timor-Leste tomak nia saúde no nia moris.

"Maromak rasik fó matenek ba nia kriatura ema atu bele hetan dalan hodi hasees an husi akontesimentu sira ne'ebé bele halo terus kriatura ema. Nu’udár Maromak nia futar lia-fuan ne'ebé dehan, 'Ha'u lakohi ema sira-nia mate maibé ha'u hakarak sira konverte, atu hetan moris (Ez. 18, 23)', haree ba razaun sira ne’e hotu no hatudu mós ita-nia komuñaun ho Amu Papa no Igreja Universál, mak Bispu sira deside tuir orientasaun Dekretu Papal kona-ba Covid-19," dehan Arsebisu.

 

Pontu hirak ne'ebé deside iha CET mak:

1. Husu ba Amu Lulik sira atu bele le’e, kumpre no divulga Dekretu Papal kona-ba COVID-19

2. Tuir dekretu ida ne’e duni, Amu Bispu sira deside katak selebrasaun litúrjika sira hotu, maski iha tempu Paskál, laiha partisipasaun  Povu

3. Sarani sira tuir selebrasaun iha sira-nia uma, bainhira missa liu husi rádio ou televizaun biar la simu komuñaun eukaristika maibé halo komuñaun espiritual (sei fornese fórmula ida ba sarani sira atu halao komuñaun espiritual)

4. Baibain ita hatene katak missa sem komuñaun missa la kompleta maibé haree ba situasun ida hanesan ne’e, tempu kalamidade públika no mundiál, uma Kreda dispensa sarani sira husi komuñaun eukarístika no konvida sarani sira halo komuñaun espiritual.

5. Atu evita perigu  kontájiu, husu ba Amu Lulik sira atu tuir rigorozamente orientasaun no desizaun Amu Papa no Conferência Episcopal Timorense (CET) nian ne’e.

6. Amu Lulik sira laiha dispensa kona-ba sira-nia obrigasaun saserdotal, husu de'it halo ho prudênsia.

7. Ba konventu sira,  Semináriu sira no Komunidade relijiozu religiosa sira bele halao selebrasaun ba de'it membru sira komunidade nian, no sétimu Orientasaun sira ne’e vigora dezde data de publikasaun to'o mosu fali orientasaun seluk.

Rate this item
(1 Vote)
Last modified on Wednesday, 25 March 2020 09:23
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.