"Enkontru ida ne'e inisiativa ami Diocese ninian, tanba iha semana hira nia laran ami rona husi ekipa Sentru Integradu Jestaun Krizi dalaruma temi kona-ba atu apoiu espiritual pisikologia moral ba ita nia maluk sira moras iha izolamentu ka kuarentina, entaun ami tur hamutuk forma ekipa oan ida atu aprezenta ba ekipa governu ninian mak ami hakbesik, tanba ita nia Primeiru Ministru mak sefia ekipa ida ne'e, entaun ami hakarak atu ba maibe ami agradese tebes tanba ita nia Primeiru Ministru ho haraik aan mai to'o iha fatin ida ne'e", Dehan Dom Virgilio ba jornalista sira hafoin Sorumutu ho Primeiru Ministru Taur Matan Ruak iha Paco Episkopal Bidau Lecidere, Tersa (28/4).

 "Tuir lolos ami mak atu ba, maibe ita nia Primeiru Ministru hit aan mai to'o iha fatin ida ne'e no ami bele aprezenta ekipa ida ne'e ba ekipa Governu nian karik presiza iha apoiu ruma husi uma kreda ninia liu-liu ba iha apoiu moral no espiritual, ami mos iha ona ekipa ida kompostu husi Padre, Madre no Irmao sira prontu atu servisu hamutuk atu fasilita, ida ne'e mak objetivu prinsipal ne'ebe lori ami mai hasoru malu iha fatin ida ne'e", tenik Nia