Print this page

Lere: Naimori iha Direitu Uza Batina, Sala ba Konfesa

Screen Shot foto Konseleiru KHUNTO, Jose Naimori ne'ebe viral iha favebook hodi halo Igreija Nai lulik sira husi katolika hasai lian kroat Screen Shot foto Konseleiru KHUNTO, Jose Naimori ne'ebe viral iha favebook hodi halo Igreija Nai lulik sira husi katolika hasai lian kroat Foto Screen Shot

Tempotimor (Dili)-Xefe Estadu Maior FALINTIL Forsa Defeza Timor-Leste (F-FDTL) Maijor Jeneral Lere Anan Timur dehan, atributu ne'ebé Konselleru Partidu KHUNTO Naimori Bucar uza hodi fó juramentu ba ema la kontra lei.

Deklarasaun Lere ne'e relasiona ho preokupasaun husi Amu Domingos Maubere ba atributu ne'ebé Naimori uza, tanba konsidera kontra ona prinsipiu igreja Katolika.

Tuir Lere, Konstituisaun RDTL fó dalan ba kada sidadaun atu uza kustume, tradisaun ka kultura ne'ebé idaidak iha.

"Se ha'u-nia alin Naimori halo ne'e, nia halo nia tradisaun, nia kultura ne'e ha'u la hatene, mais ita-nia konstituisaun mós fó dalan, uzu kostumes, tradisaun ka kultura ne'e ida-idak halo," dehan Lere iha Palásiu Prezidensiál Bairu-pite Dili, Kuarta (01/07).

Kona-ba preokupasaun katak asaun Naimori ne'e kontra prinsipiu igreja Katolika, Lere hatan katak, se Naimori halo sala, ba konfesa.

"Nia Katólika, se nia hanoin halo sala, nia tenke ba konfesa, mais agora ema padre mak konfesa nain, ne'ebé nia dehan sala ne'e, Naimori aban-bainrua tenke ba konfesa, mais se nia sente la sala, entaun mate mak São Pedro deside, ba infernu ka ba Lalehan," dehan nia.

Lere mós dehan, rituál ne'ebé Naimori halo la afeta ba estadu.

"Ha'u mós tinan-tinan ba fó han ha'u-nia lulik ne'e, ha'u la ameasa estadu ida ne'e. Ha'u mós sarani, mais ha'u mós fiar ha'u-nia tradisaun."

Maijor Jenerál ne'e mós dehan, buat ne'ebé halo públiku konfuzaun mak Naimori hatais fali batina.

"Buat ne'ebé halo ita konfuzaun mak ha'u-nia alin Naimori hatais fali batina, nia la ba eskola semináriu, tanba saida mak nia tenke hatais batina. Ami uluk iha ai-laran mós balun hatais batina, mais ha'u haree iha facebook ha'u husu ne'e Amu ida ne'ebé mak ne'e? Pois ha'u husu tuun sa'e, ema dehan ne'e alin Naimori, entaun ha'u dehan husik ba tanba nia direitu ne'ebé nia sala ka loos ne'e ha'u lakohi ko'alia," nia afirma.

Maske Timor maioria katolika, maibé Lere dehan, seidauk iha lei ne'ebé bandu Timor-oan sira atu halao sira-nia kustume.

"Ita agora moris iha sosiedade ida sivilizadu, edukadu no dezenvolvidu, ne'ebé la'ós lori manu-ran mak atu ukun nasaun ne'e," nia dehan.

Rate this item
(4 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items