Estudante Lalika Fó Presaun Ba Governu

MESSK Longuinhos dos Santos ko'alia ba Jornalista sira iha palasiu do Governu MESSK Longuinhos dos Santos ko'alia ba Jornalista sira iha palasiu do Governu Foto Tempo Timor

Tempotimor (Dili) - Ministru Ensinu Superiór Siénsia no Kultura (MESSK), Longuinhos dos Santos, husu ba estudante universitáriu sira iha Timor laran labele fó presaun ba governu, maibé tenke kumpre devér hodi estuda.


"Laiha ema ida atu fó presaun ba membru governu sira, desizaun ne'e depois ita sei fó, maibé husu ba alin estudante sira atu bele kumpre sira-nia devér no direitu kontinua nafatin estuda, atu bele rekupera siénsia ne'ebé durante Estadu Emerjénsia la hetan", dehan nia, hafoin reuniaun Konsellu Ministru, iha Palásiu Governu, Kuarta (22/07).

Nia dehan, estudante sira iha UNTL atu halo rejistrasaun propinas ba semestre pár nian, hein desizaun husi reitór rasik.

"Propinas UNTL nian ha'u haruka ona karta ba iha ne'ebá, depois depende ba reitór atu bele implementa", nia informa.

Governante ne'e esplika, informasaun ne'ebé hakerek ona iha karta laran klaru ona no oinsá atu implementa ne'e depende ba reitór UNTL ho ninia estrutura tomak.

Antes ne'e, estudante ensinu superiór sira la satisfás ho desizaun MESSK ne'ebé hasai despaxu ba kada universidade hodi kontinua selu semestre pár, maski situasaun Covid-19 ne'ebé halo governu dekreta Estadu Emerjénsia ba dala tolu no prosesu aprendisajem hotu paradu. (*)

Rate this item
(0 votes)
Last modified on Thursday, 23 July 2020 09:50
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.