Ministériu Ensinu Superiór Siénsia no Kultura deside ona atu estudante sira tenke kumpre sira-nia devér hodi kontinua selu propina.
Ministru Longuinhos Monteiro hateten, estudante sira iha direitu atu eskola no sira mós tenke kumpre sira-nia devér hanesan estudante.
"Estudante sir-nia devér maka estuda, alende estuda, sira mós tenke kumpre selu propina", dehan nia, ba jornalista sira, iha edifísiu MSSI, Kaikoli, Kinta (23/07).
Nia dehan, kona-ba petisaun estudante sira nian iha karta rua mak hatama ba MESSK. Ida husi UNTL, ida seluk husi Asosiasaun Universitáriu Timor-Leste (AUTL).
"UNTL nian ha'u foti ona desizaun no entrega ona karta ba Reitór UNTL nian. Agora, mai fali iha AUTL ne'e, governu liuhosi ministériu haree maibé konfuzaun. Tanba UNTL mós iha laran hotu. Ha'u la hatene ida ne'ebé maka loos," dehan nia.
Nia hateten, karta petisaun husi estudante UNTL nian tuir-nia dalan legál, tanba lori ba reitór, no enkamiña karta ida ba ministériu, hamutuk ho karta petisaun estudante sira nian, entaun bele iha komunikasaun entre instituisaun.
Nia dehan, ba karta petisaun AUTL nian parte MESSK laiha kompeténsia atu hola desizaun tanba governu halo de'it monitorizasaun, maibé kompeténsia tomak iha institutu, fundadór no estrutura sira.
"Ba universitáriu privadu governu só fiskaliza. Iha direitu atu hasa'e no hatuun ne'e husi fundasaun no estrutura sira maka bele define,” hateten nia.
Nia dehan, iha nasaun ne'ebé de'it ko'alia kona-ba edukasaun no matenek la'ós gratuita, maibé tenke selu. (*)