"Reativa eskola sira kuaze 80% ona, entaun ita espera katak iha fim-Jullu nian bele atinje ona to'o 90%," dehan nia, iha Salaun Ministériu Solidariedade Sosiál no Inkluzaun (MSSI), Kaikoli, Kinta (23/07).
Ministru ne'e mós dehan, balun seidauk bele reativa tanba iha problema hanesan iha Dili ne'e parte Atauru mak balun seidauk reativa, tanba fatin balun ne'ebé susar atu to'o iha ne'ebá, inklui Oekusi tanba ne'e espesiál, entaun la hatene se mak atu reativa, maibé espera tempu besik situasaun sira ne'e bele la'o ho di'ak.
"Ita esforsu nafatin tuir ita-nia kbiit, ita la obriga, tanba iha rekizitu hitu kedas, entaun tenke prienxe kritériu sira ne'e," nia dehan.
Entretantu, regra hitu ne'ebé Ministériu Saúde fó sai mak hanesan; Eskola tenke asesu bee-moos, kada aula tenke estabelese bee ne'ebé kompleta ho sabaun, distansiamentu sosiál iha aula laran, mantein uza máskara, ambiente eskola tenke moos, eskola tenke dezinfeta, profesór sira tenke tuir formasaun kona-ba Covid-19, inklui taka mós informasaun kona-ba Covid-19. (*)
