Tempotimor (Dili): Primeiru-Ministru, Taur Matan Ruak, hodi VIII Governu Konstitusionál nia-naran hato’o votu parabéns ba Arse-bispu husi Arkidioseze Metropolita Dili, Rev. Don Virgílio do Carmo da Silva, SDB, ne’ebé iha Domingu (24/8), hetan ona insígnia Páliu (Pálio-portugés ) husi Santa Sé, ne’ebé atribui liuhusi Prezidente Konferénsia Episkopál Timorense, Dom Norberto Amaral, iha ámbitu selebrasaun misa Domingu, iha Katedral Nossa Senhora Imaculada Conceição, Dili.
“Hodi Governu Konstitusionál VIII nia naran no ha’u-nia naran rasik, hakarak hato’o votu parabéns ba Amu Don. Virgílio do Carmo da Silva SDB, Arsebispu Arkidioseze Metropolita Dili nian, ne’ebé horisehik simu Páliu husi Santa Sé. Infelizmente ha’u labele partisipa iha serimónia ne’e tanba kondisaun saúde, maibé atraves meius ne’e manifesta ha’u-nia votu susesu”, dehan PM Taur iha komunikadu imprensa ne’ebé www.tempotimor.com, Segunda (25/8).
Komunikadu ne’e haktuir símbolu husi Páliu ka Kanopi ne’e, hodi indika komuniãun Arse-bispu nian ho Pontífise no ho Tronu Pedro nian, ho ida ne’e hafoin Kanopi ne’e halo tiha, rai hela iha rate Saun Pedro nian (iha altár konfisaun nian iha Bazílika Saun Pedro, Roma) to’o iha solenidade Saun Pedro no Saun Paulo nian, hafoin ne’e entrega husi Papa ba Arsebispu sira. Iha kazu Arse-bispu ne’ebé atu simu Páliu la hola parte iha selebrasaun ne’e, nia páliu kontinua rai hela iha rate Saun Pedro nian to’o entrega ba na’in.
Kanopi mai hosi língua latina: (pallium, manto) halo husi kabas bibi-malae nia kulit ne’ebé hetan bensaun husi Papa iha memória litúrjika Santa Inés nian, kompostu husi kabas bibi-malae tahan rua ne’ebé hafutar ho krús kór metan. Arse-bispu sira uza iha sira-nia kabaas ho fita tara tun iha sira-nia peitu no fita seluk iha kabaas kotuk, nu’udar símbolu Arse-bispu hanesan bibi-atan ida.
Insígniasaun páliu ne’e mós hatudu Arse-bispu nia autoridade kona-ba Arkidioseze. Arse-bispu hanesan bispu iha sidade importante (metrópole) tau matan mós ba dioseze viziñu sira iha kazu vakansia (mate ka renúnsia husi bispu). Tanba ne’e, Arse-bispu bele uza nia Páliu ne’e iha selebrasaun hotu-hotu ne’ebé nia prezide ka konselebra iha Arkidioseze ou iha dioseze sufragánea. (*)
HAKARAK HATENE PARTISIPASAUN MAUN BO'OT XANANA GUSMAO IHA KOMBATE COVID 19 LOKE VIDEO IHA KARAIK NE'E.
<iframe width="560" height="315" src="https://www.youtube.com/embed/0uXuwzjCkMk" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>