Tuir nia, durante ne'e públiku akompaña artista timoroan sira-nia vontade sempre promove nasaun nia-naran, morin iha rai-li'ur maibé ikus sira-nia nasaun rasik la fó protesaun adekuadu ba sira.

Liga ba preokupasaun ne'e, parte husi ekipa ALMAMOR hasoru malu ho Deputadu Bankada FRETILIN, iha Parlamentu Nasionál atu fó hanoin hikas ba deputadu sira atu reativa hikas diskusaun ba proposta lei balun, ne'ebé antes ne'e aprezenta ona ba PN.

"Ami mai hasoru malu ho Bankada FRETILIN husu para Estadu aprezenta hikas proposta lei ne'ebé uluk ami aprezenta ona mai PN," dehan Henrique iha PN, Tersa (22/9).

Konteúdu husi proposta lei ne'e, nia afirma, bele valoriza artístiku Timor-Leste nian ne'ebé durante ne'e seidauk hetan valorizasuan husi Estadu.

Kona-ba artístiku ne'e kompara ho atividade desportivu, artista mak nia valór boot liu.

Nia dehan, durante ne’e governu gasta osan boot ba iha atividade desportivu kompara ho artístiku, maibé Timor-Leste nian naran morin no naklekar iha mundu tomak nia matan, liuhusi obra artístika.

Iha fatin hanesan, eis-deputadu FRETILIN, Eládio Faculto hateten, nia deside mai Parlamentu Nasionál tanba atu levanta hikas lei balun, tanba molok ne'e nia hanesan eis-deputadu iha lejizlatura datoluk, sira prepara ona lei kona-ba autór artístiku Timor-Leste nian.

Nia esplika, lei ne'e rasik la'ós proteje artístiku sira iha timor-leste, maibé ba mós monografia, peskizadór, literatura, artezanatu, Tanba buat hirak ne'e hola parte mós iha vida artístiku nian.

Nia fiar katak, ho proposta lei ne'ebé iha, deputadu sira sei fó apoiu másimu, tanba realidade hirak ne'e mós hola parte sai preokupasaun boot ba Timor-Leste. (*)