Login to your account

Username *
Password *
Remember Me

Konfrontu iha Facebook, Adolmando Suspende Funsionáriu Nain 5

Kampus Universidade da Paz Kampus Universidade da Paz Foto Suplai

Tempotimor (Díli)- Tuir vítima sira ne'ebé Reitór UNPAZ, Adolmando Amaral suspende katak, tinan barak ona, servisu iha Universidade da Paz, la komete erru, maibé tanba diskuti malu ho Reitór, iha média sosiál Facebook, derepente de'it, iha dader hetan karta husi Reitór katak, para servisu durante Reitór nia mandatu.

Funsionáriu nain haat, inklui dosente ida sai vítima, tanba defende naran di'ak UNPAZ nian, bainhira atuál Reitór halo komentáriu, iha nia pájina facebook katak, UNPAZ hetan akreditasaun internasionalmente ne'e, tanba saudozu Lucas da Costa "Rama Metan" hola de'it ho osan rihun $6 kada tinan.

"Tópiku ne'ebé Reitór UNPAZ, Adolmando fó sai iha facebook mak, dosente balun halo módulu de'it mós lahatene, depois nia mós temi to'o saudozu Lucas da Costa "Rama Metan" katak UNPAZ akredita iha nasionál ho greath C, no rekoñesimentu internasionál ba UNPAZ ne'e, UNPAZ la ba kompete, maibé investe de'it osan $6000, para internasionál rekoñese ka sosa de'it," dehan vítima AAR ba www.tempotimor.com iha nia rezidénsia Mandarin, Díli, sesta (2/10).

Nia mos akresenta, tanba reitór atuál hatete prémiu ne'ebé UNPAZ hetan ne'e sosa de'it, tanbá ne'e, hanesan dosente, funsionáriu inklui alumni UNPAZ la simu, no ikus mai, konsege atake malu, iha média sosiál facebook.

"Ataka malu iha FB ne'e, nu'udar pesoál Adolmando Amaral no A, maibé komu nia temi to'o saudozu Rama Metan, entaun ami la simu. Depois reitór mak hamonu tiha ona Universidade nia oin," nia katak.

Fontes ne'e afirma katak, aktu reitór nian, hodi públika informasaun iha facebook ne'e, viola ona estatutu UNPAZ nian, iha artigu 11 alinea (e no f).

Ho deklarasaun ne'ebé reitór fó sai iha média facebook ne'e, vítima sira nu'udar mos alumni konsidera, UNPAZ naran dois ona, tanba reitór Adolmando mak hafoer.

Tuir AAR katak, durante konfrontu, iha média sosiál, atuál reitór mós kontaktu kedas ba vítima ne'e, nu'udar dosente ida, hodi husu atu hamate komentáriu sira iha facebook, atu vítima ne'e, bele hetan oportunidade hodi ba kontinua mestradu, iha rai liur.

"Iha kalan ne'ebé konfrontasaun la'o hela, iha média sosiál ne'e, reitór Adolmando telfone ha'u katak, maun-alin fiar ha'u, rona malu nu'udar Mambae oan, o hamate tiha o nia facebook sira ne'e, para ha'u garante o ba foti mestradu (S2) durante ha'u nia mandatu tinan haat nia laran, maibé ha'u la konkorda, tanba ha'u lakohi subornu," konta husi vítima ne'e.

Iha fatin seluk, reitór UNPAZ Adolmando Amaral hatete, hapara funsionáriu sira, tanba dúvida ho kapasidade reitór no nia estrutura.

"Ami tenta halo komunikasaun ho nia, maibé nia la konsidera ida ne'e. Nia dúvida fali ho estrutura atuál ne'e, entaun ami deside katak ita labele servisu ho funsionáriu ne'ebé duvida ba ita, entaun reitór ho nia kompeténsia halo suspensaun ba sira," katak Adolmando.

Iha fatin hanesan funsionáriu ho inisiál IM ne'ebé hetan mós suspensaun ne'e katak, durante nia servisu nunka komete erru ruma iha servisu fatin.

"Ha'u nunka komete kazu ruma iha ha'u nia servisu fatin, maibé bainhira ha'u simu karta suspensaun husi reitór ne'e ha'u sente triste loos," dehan nia.

Entretantu diskusaun ka konfrontasaun entre reitór no funsionáriu sira ne'e, akontese iha loron 25 Setembru 2020, semana kotuk, ne'ebé ikus mai iha loron 01 fulan outobru 2020 ne'e, hetan suspensaun husi reitór.

Komentáriu ne'ebé Reitór UNPAZ, Adolmando Amaral tau iha status facebook hanesan "Mezmu ita buka atu aprende tan, maibé balu sempre kestiona nafatin husik ba, kolega sira ita ne'ebé iha vontade atu aumentu ita nia koñesimentu, para iha vokasaun henesan dosente loloos. Sira be kestiona ita ne'e dala ruma prepara de'it sílabus no planu lisaun mós dalaruma sei araska hela, mais gosta krítika ho nune'e maka komik ne'e hahú husi ne'e kedas".

Entretantu husi komentáriu reitór UNPAZ nian iha média sosiál facebook ne'e hetan komentáriu 39, ema 183 mak fó sinal ok (?), ema ne'ebé fó sinal korasaun (❤) hamutuk 14 no ema ne'ebé fó espresaun hamnasa (?) hamutuk rua.

Funsionáriu sira ne'ebé reitór UNPAZ, Adolmando Amaral suspende, durante nia mandatu mak, AAR nu'udar dosente, DS nu'udar staf administrasaun finansas, LM nu'udar staf administrasaun lojístika, JVA nu'udar staf biblioteka no IM nu'udar staf administrasaun ba asuntu estudantil.(*)

Rate this item
(2 votes)
Last modified on Saturday, 03 October 2020 12:19
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter