Marí Alkatiri hato'o lia hirak ne'e bainhira sai oradór ba semináriu nasionál iha Institute of business (IOB) fomentu ho tema "Valór Polítiku no Estratéjiku Proklamasaun Independénsia RDTL 28 Novembru 1995".
"Uma lisan kontinua importante atu bele halibur malu nuudar familia iha laran, maibé importante liu mak papél uma lisan nian tenke harii nasaun, para nasaun ne'e mós sai uma lisan boot ida, para bainhira ita hotu presiza bele nahe biti boot hodi rezolve ita-nia problema," Marí Alkatiri dehan ba estudante no partisipante sira semináriu nasionál iha Fomentu, Tersa (24/11).
Nia mós husu katak, labele halo nasaun hanesan nasaun seluk ne'ebé ida-idak defende ninia abut, maibé tenke hadi'a abut ne'e, tanba ne'e, nasaun ne'e hanesan uma lisan nasionál timoroan hotu nian.
"Nia kakuluk aas liu mak Ramelau no ninia membru mak povu Maubere, ne'e mak nasaun. Se ita prezerva hanesan ne'e, ita sempre uza ita-nia valores no prinsípiu universais, ita bele la'o ba oin ho seguransa, paz no estabilidade, maibé ekonomia mós impprtante, tanba ne'e tenke dezenvolve ekonómia," nia dehan.
Entretantu, partisipante iha semináriu nasionál ne'e mai husi estudante no dosente sira iha IOB nian, inklui Prezidente Konsellu Imprensa, Virgilio Guterres.(*)