Ministru Armindo Maia simu ona informasaun iha eskola balun mak hahú ona atividade hanesan aprendijazen, inkrisaun no balun foin hahú orientasaun, nune'e semana ida ne'e sei halao preparasaun maibé segunda-feira (semana oin) hotuhotu tenke komesa.

Mesmu nune'e, MEJD rasik sei estuda no monitoriza eskola sira iha parte fronteira ne'ebé mak barak seidauk halo atividade tanba risku tebes ba covid-19.

"Iha fronteira ne'e ita tenki estuda didi'ak lai, ita labele obriga, se karik situasaun la permite, entaun ita kontinua monitoriza nafatin para iha buat ruma prontu kompeténsia ministériu nian foti medida saida maibé dala-barak mós presiza lori fali ba iha Konsellu Ministru mak deside," dehan Armindo Maia iha Palásiu Governu Dili, Kuarta (20/01).

Governante ne'e akresenta, MEJD kontinua mos servisu hamutuk ho parseiru NGO sira atu distribui fasilidade prevensaun Covid-19 hanesan maskára, sabaun fase liman inklui fasilidade seluk ne'ebé parte lojístika MEJD nian perpara ba área eskola iha fronteira.

Entertantu tuir observasaun www.tempotimor.com nota katak, kuaze maioria atividade eskolar iha kapitál Dili hahú halo prosesu aprendijazen maske iha hela ámbitu implementasaun estadu emerjénsia.(*)