Ministru Longuinhos dehan, maske estatutu UNTL nian ne'e halo aprovasaun durante tinan sanulu, maibé seidauk hatudu progresu di'ak, tanba iha estatutu temi kona-ba fakuldade hitu, maibé realidade UNTL nia fakuldade aumenta ona ba sia.

"Ha'u dezafia señor reitór foun atu-bele halo revizaun ba lejizlasaun balu hanesan estatutu UNTL ne'ebé la relevante ho kondisaun ne'ebé mak iha. Ha'u fó ezemplu iha estatutu ne'e mensiona fakuldade hitu, maibé UNTL agora daudaun iha fakuldade sia ne'ebé maka funsiona", tenik MESSK, Longuinhos dos Santos, hafoin fó pose ba reitór UNTL foun iha Fakuldade Enjeñeria iha Suku Hera, sesta (29/01).

Nia dehan, UNTL hanesan instituisaun autónomu, maibé tutela hela ba Ministériu Ensinu Superior Siénsia no Kultura (MESSK), tanba ne'e maka nia husu ba reitór eleitu atu haree mós kona-ba rejíme karreira dosente sira nian, tanba bele fó "bein-estár" ba dosente sira.

"Ne'e direitu dosente sira-nian para atu-bele hala'o ajustamentu ba dosente sira-ne'ebé maka seidauk bele tama iha rejime kareira ida-ne'e", dehan nia.

Ministru Longuinhos kontinua koko Reitór UNTL eleitu, latu mellora kursu ka programátiku ne'ebé maka hetan avaliasaun husi ajénsia nasional ba akreditasaun akadémika nian, tanba durante avaliasaun, maiória mak hetan valór sufisiente.

Ministru Longuinhos fiar iha Joăo Soares Martins nia mandatu 2021 to'o 2026 bele hadi'a kursu hirak ne'e.

"Ha'u-nia mensajen liga liu ba señor magnífiku reitor eleitu, atu primeiru tenke liña koordenasaun no servisu, komunikasaun no kooperasaun ho MESSK", dehan nia.(*)