“Ami entrega dokumentu hodi inklui regra hotu atu loke universidade katólika. Antes ne’e iha loron 19 marsu liubá, ami hatama karta pedidu ba abertura prosesu no hafoin prosesu ne’e, ekipa instaladora serbisu maka’as, nune’e iha loron 16 jullu entrega dokumentu hotu tuir padraun ne’ebé instituisaun husu hodi loke Universidade Katólika Timorense (UKT)”, dehan Dom Virgílio iha edifísiu MESSK, sesta (16/07).
Inisiativa husi prosesu hari’i Universidade ne’e la’ós Arkebispu nia mehi, maibé mai kedan hasi Dom Carlos Filipe Ximenes Belo nia tempu, ne’ebé forma ekipa halo estudu viabilidade, hafoin to'o iha Dom Alberto Ricardo koko atu tau infraestrutura maibé la konsege.
Haree ba esforsu ne'ebe iha, hahú la’o ba oin, tanba forsa ida-ne’e mai hosi baze rasik, ne’ebé komunidade barak partikularmente eskola iha Dili.
Nune'e kipa Dioseze Dili prontu atu kolabora ho MESSK ligadu ho dokumentu sira, nune'e bele hahú ho Fakuldade Sosiál, hanssan edukasaun, lian no arte, inklui fakuldade exata, mak hanesan siénsia no umana, no bainhira buat la'o mak hafoin bele kria tan fakuldade siénsia médika no agríkola.
Kona-ba edifísiu, daudaun ne’e preparasaun atinje ona 80%, ne’ebé hanesan edifísiu antigu ida mak halo reabilitasaun no Dioseze Dili mak sai na’in ba propriedade sira.
Rekursu umanu hirak ne’ebé sei halo serbisu ne'e hamutuk ema na'in-50 konpostu husi timoroan no estranjeiru, ne’ebé ho grau doutoramentu no mestradu.
“Sei iha reitór hodi tau matan, nu’udar Arsebispu sei nafatin tau matan, tanba ne’e priopridade Arsebispu nian”, dehan nia.
Iha fatin hanesan, Diretora Jerál Ministériu Ensinu Superior no Siénsia no Kultura (MESSK), Maria Filomena Lay Guterres hatete, dadauk simu ona dokumentu kona-ba harii Universidade Katólika iha Dili.
“Hein katak dokumentu sira kompleta ona ho rekizitu sira hosi padraun lisensiamentu no karik iha buat ruma kolabora hodi kompleta, atu nune’e prosesu bele termina tuir tempu fulan 3 ka bele altera ba fulan-neen”, dehan nia.
Enkuantu Dokumentu ne’e entrega hosi Xefe Instaladora Universidade Katólika Timorense, Belarmino da Silva, ba Diretora Jerál MESSK, Maria Filomena Lay Guterres, hodi bele analiza antes atu hari’i. (*)
