Governu Promete Buka Solusaun ba Estudante Tuir Aula

Ministru Finansas, Rui Gomes Ministru Finansas, Rui Gomes Foto Ofisiál

Tempotimor (Dili)-Ministru Finansa (MF), Rui Gomes hatete, pozisaun governu nafatin kumpre ninia komprimisu proteze timoroan sira husi covid-19 nomós buka solusaun ba estudante sira atu tuir aula.

“Governu Timor-Leste komprometidu atu proteje populasaun Timoroan sira husi pandemia Covid-19 maibé mós atu normaliza situasaun iha ne’ebé labarik sira bele filafali ba eskola”, dehan nia liuhusi sorumutuk anual ho parseiru dezenvolvimentu iha salaun Ministériu Finansa, Aitarak-Laran, sesta (30/07).

Aleinde buka mós solusaun ba atividade negósiu atubele loke filafali no ikus mai bele rekupera filafali kestaun ekonomia husi kontrasaun negativu 7,8% iha tinan 2020 ba pozitivu 1,8%.

Tanba, agora dadauk governu iha ona prosesu ba preparasaun Orsamentu Jerál Estadu (OJE), tinan fiskál 2022 ne’ebé foku ba área prioridades neen (6) ba Estadu atu investe mak hanesan Dezenvolvimentu Kapitál Umanu, Abitasaun no Inkluzaun Sosiál, Setór Produtivu, Dezenvolvimentu Setór Privadu no Kooperativa, Dezenvolvimentu Rurál; no Boa Governasaun.

Ho planu hirak ne’ebé sei sai prioridade iha tinan 2022 maka, Governu fiar katak prioritizasaun hirak ne’e sei lori impaktu dezenvolvimentu direta ba populasaun no rezultadu ida ne’ebé mak lais liu.

Tanba ne'e, governu kontinua hato'o apresiasaun ba parseirus dezenvolvimentu ne’ebé hamrik hamutuk ho Governu Timor-Leste durante tempu defisil foin lailais ne’e.

“Ita-Boot sira nia kontribuisaun durante tempu defisil ne’e ajuda ona ami no sei kontinua ajuda ami hodi ultrapasa dezafiu sira ne’ebé mak kauza husi xoke esternu Covid-19 no Kalamidade Públiku, Siklaun Tropikál Seroja,” dehan nia.

Iha loron sesta (30/07), governu daualu ne’ebé lidera husi Primeiru Ministru (PM), Taur Matan Ruak, deside konvoka reuniun ka sorumutuk anual ho parseiru dezenvolvimentu sira hodi aprezenta no deskute asuntu fundamental tolu iha Timor-Leste.

Asuntu ne’ebé sai prioridade ba dikusaun ne'e hanesan Programa Vasinasaun Nasionál, Rekuperasaun Ekonómiku no Rekonstrusaun Pos Covid-19.

Serimónia abertura hahú ho aprezentasaun dansa kulturál husi Asosiasaun Arte no Kultura Timor Furak ho partisipasaun husi reprezentante sira husi Parlamentu Nasionál, Membrus Governu Konstitusionál Daualuk, Autoridade Munisipál no RAEOA, Korpu Diplomátiku, Parseirus Dezenvolvimentu, Organizasaun Sosiedade Sivíl, Setór Privadu no Jestór sira inklui mídia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« September 2021 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30      

Tempo Timor Networks

Online Counter