"Ami hakarak hato'o ba Governu katak, ami presiza tebes ita-bot sira-nia tulun ba área formasaun sira iha kada fakuldade ninian, oinsá hodi prepara rekursu umanu ba munisípiu ida ne'e nomós enjeral ba nasaun RDTL liliu ba dezenvolvimentu kosta súl ninian ne'ebé sai programa estratejiku ba estadu no Governu rasik", dehan Reprezentante Fundasaun Institutu Boaventura Timor-Leste, António Nunes Magno iha IBTL, segunda (16/08).
Xefe Casa Sivíl Prezidente Repúblika, Francisco Maria Vasconselho hatete, nia simu ona preokupasaun husi Institutu Boaventura Timor-Leste (IBTL) no sei hato'o ba Prezidente Repúblika.
"Ohin sira entrega ona karta mai ha'u ba Prezidente Repúblika, mais normalmente Prezidente Repúblika la halo servisu ne'ebé Governu nian maibé Prezidente Repúblika bainhira simu surat ruma husi instituisaun sira hanesan ne'e sei ko'alia ho Governu liuhusi enkontru regular ho Primeiru Ministru", dehan nia.
Ho proposta ne’ebé hato'o sei haree oinsá atubele trata no atende pedidu ho nesesidade sira hanesan ne'e prioridade.
IBTL ne’ebé foin kompleta tinan 4 ho fakuldade agrikultura, saúde, téknika, ekonomia maibé iha fakuldade rua mak hetan ona lisensa husi Ministériu no fakuldade rua seluk sei iha hela prosesu, kontinuasaun hein lisensa husi Ensinu Superior. (*)
