Ministru MESSK, Longuinhos dos Santos hatete, memorandu entendimentu ne'ebé halo atu fasilita estudante finalista sira husi ensinu sekundáriu jerál no ensinu sekundáriu tékniku vokasionál, inklui rejime espesiál bá finalista ne'ebé remata ona ensinu sekundáriu iha tinan 4 liu bá atubele asesu bá UNTL ho IPB.
“Prosesu asesu engressu ida-ne'e iha rejime rua, ne'ebé mak rejime jerál no rejime espesiál, rejime jerál ne'e foka liubá finalista husi ensinu sekundaria jerál nomós tékniku vokasionál, nomós rejime espesiál bá oportunidade ne'e bá estudante finalista ne'ebé mak akaba tiha ona iha tinan 4 kotuk liubá fó oportunidade bá sira”, dehan Longuinhos hafoin asina memorandu, iha salaun MSSI, Kaikoli, kinta (19/08).
Akordu ne'e iha mós rejime espesiál bá veteranu nia oan sira, hakbi’it bá ema vulnerável no bá ema ho defisiensia inklui mós membru PNTL no F-FDTL.
Maibé, rejime espesiál ne'e hamutuk modalidade 16, tanba liuhusi asinatura ne'e, sei halo mudansa rua iha rejime jerál, ne'ebé fahe bá sub-rejime jerál, ensinu sekundáriu jerál no sub-rejime jerál bá tékniku vokasionál.
“Ninia razaun fundamentu ita fahe bá rua, tanba tinan-tinan ita sempre hasoru difikuldade kuandu ita atu identifika estudante sira mais mellór, tanba ensinu sekundáriu jerál ho ninia disiplina ne'ebé mak ho kuantidade maka’as 6, tékniku 4 de'it kuandu partisipa iha izame nasionál, sira-nia valór ne'e kuandu ita haree mellór kualifikasaun ne'e la to'o ensinu sekundáriu jerál, tanba ne'e mak rejime jerál ne'e ita fahe bá rua", esplika nia.
Vise Primeira Ministra no MSSI, Armanda Berta dos Santos hatete, akórdu ida ne'e, atu fasilita kbi’it la’ek nia oan sira no mós ema ho defisiensia sira hodi bele asesu bá instituisaun ensinu superiór públiku UNTL no IPB.
“Akórdu ida-ne'e hodi haree ba hakbi’it bá ema kbi’it la’ek nia oan sira nomós ba defisiente, atu nune'e sira mós bele asesu ba universidade, tanba ne'e mak ita halo akórdu ho MESSK hodi bele tau matan bá ita-nia ema sira-ne'ebé mak kbi’it la’ek nomós ba ema difisiensia”, dehan nia.
Enkuantu, totál númeru husi rejime espesiál hakbi’it ho ema ho defisiensia ne'e sei hein kuota ne'ebé sei aprezenta husi UNTL ho IPB, nune'e bele iha númeru serteza hira mak sei asesu ba ensinu superiór públiku rua ne'e. (*)
