"Ohin ne'e, ha'u ko'alia ho Diretór Jerál Akadémiku, ami na'in-rua ko'alia hela kona-ba graduasaun prezenesiál, la'ós online. Graduasaun prezensiál ida ne'e ita sei halo iha dia 27 de Agostu, Sesta-feira. Ohin tersa tiha ona, ne'ebé ami agora halo hela preparasaun, aban (kuarta, 25/08) misa ba finalista sira. Kandidatu graduadu ne'ebé hamutuk ohin ne'e 349", informa Vise Reitór UNTL ba Asuntu Akadémiku, Samuel Venancio de Sousa Freitas, ba www.tempotimor.com iha Kampus Liceu, tersa (24/08).

Fanalista na'in-349 ne'e, antes ne'e rejista kedas tinan 2020 , no sira ne'ebé iha 2021 nian parte estrutura universidade sei planeia fali iha tempu seluk.

"Dia 27 Agostu graduasaun prezensialmente iha Hera, ba dala-24, tanba númeru graduasaun hanesan nafatin, tanba uluk ne'e sorin ba tiha online, agora mak sorin ba tiha prezensiál. Mas númeru ne'e hanesan nafatin, ita rezolve grupu graduadu husi 2020 ninian. 2021, ita seidauk trata, ne'ebé husi 2020 ninian ne'e mak ita atu rezolve agora halo hotu kedas iha dia 27 ne'e", dehan nia.

Tanba ne'e, to'o iha loron sesta (27/08), labele iha desizaun ruma ne'ebé atu pertura fali ajenda ba serimónia graduasaun ninian.

Maibé husu ba finalista sira atu kumpri nafatin regra sira ne'ebé estabelese husi protokolu Ministériu Saúde (MS) ho Organizasaun Mundiál Saúde (OMS) nian hodi prevene-an husi surtu Covid-19.

"Ida ne'e mak ami-nia graduasaun prezensiál ne'ebé sei hala'o iha dia 27 de Agostu mai. Ida ne'e mak resposta kona-ba graduasaun, prezensiál ne'ebé ami sei halo iha sesta feira, dia 27 de Agostu agora", haktenik nia.

Finalista hirak ne'e mai husi Fakuldade Agrikultura iha na'in (46), Enjeñeria Siénsia no Teknolójia (25), Edukasaun Artes no Humanidades (191), Ekonómia no Jestaun (16), Siénsias Sosias (59), Fakuldade Filozófia (12), nune'e totál hamutuk 349.

Enkuantu, finalista sira husi fakuldade medisina nian, maiória partisipa ona graduasaun iha fulan-Maiu tinan 2020, fakuldade direitu laiha, no finalista na'in-33 husi Departamentu Desportu mak sei pendente, tanba seidauk hetan akreditasaun.

Maibé parte universidade sei buka esforsu oinsá bele rezolve mós problema akreditasaun ba departamentu desportu nian atu nune'e finalista sira bele partisipa mós graduasaun ho finalista sira seluk. (*)