“Ohin ha'u simu ona karta rekomendasaun husi Ministériu Saúde no pozitivu semana ida ne'e nia laran bele hahú ona aula prezensiál ba Ensinu Superior sira", dehan Ministru Longuinhos iha Ministériu Finansas, Aitarak Laran, segunda (13/09).
Maibé Ministériu Ensinu Superior, Siénsia no Kultura hamutuk ho Ministeriu Saúde sei forma ekipa konjunta ida atubele halo monitorizasaun ba ensinu Superiór sira bainhira komesa aula prezensiál.
Enkuantu kona-ba graduasaun, bainhira aula prezensiál hahú, altura ne'e kedan bele iha ona preparasaun ba serimónia graduasaun.
Reitór Dili Institutu of Tecnology (DIT), Alvaro Menezes Amaral hatete, DIT dadaun ne'e seidauk realiza aprendizajem prezensial tanba sei hein hela despaixu husi MESSK.
“Ami to'o agora sei hein maibé iha situasaun Estadu Emerjénsia ami ladun hatene tanbasá mak laiha, se Igreja bele fó lisensa, merkadu bele la'o nusa mak universidade la la'o, eskola la la'o. Ita bele lakon jerasaun, ita lakon jerasaun kuandu ita la tau atensaun ba edukasaun, ne'ebé ami husu atensaun ba Ministériu Ensinu Superior, Ministériu Edukasaun atubele tau matan ba ida ne'e", dehan nia liuhusi telefone, segunda (13/09).
Bainhiura merkadu bele la'o, missa bele la'o nusa mak universidade seidauk la'o, ne'e tanba saida?. "Ne'e fó inserteza ba ita-nia joven sira. Sira-nia futuru importante tebes kualidade edukasaun ne'e tenke garantia".
Reitór UNPAZ, Adolmando Amaral hatete, sira hala'o aktividade prezensiál hanesan baibain tanba razaun konfinamentu obrigatáriu Governu hakotu ona.
“Iha Universidade da Paz ami hasai ona despaixu ida para reativa atividade prosesu aprendizaje, ami husu ba ami-nia estudante para komesa aban ba oin sira bele asesu ona mai universidade atu tuir aula prezensiál, tanba durante konfinamentu obrigatóriu ami haree iha partisipasaun aprendeizajen online ne'e ladun ativu mezmu sira hetan ona subsídiu pulsa maibé partisipasaun ba prosesu aprendizajen online ne'e menus loos", dehan Adolmando Amaral.
Tanba Governu labele tau importansia de'it ba atividade ekonomi, relijiozu no transporte sira maibé presiza tetu didi'ak kona-ba atividade edukasaun nian tanba edukasaun mak nasaun sei presiza iha futuru. (*)
