Ministru Ensinu Superiór Siénsia no Kultura (MESSK), Longuinhos dos Santos hatete, nia aprezenta ona prelimináriu rezultadu estudu viabilidade sidade universitáriu nian.
"Ohin halo diskusaun ho sua eselénsia Primeiru Ministru (PM), ne'ebé aprezenta kona-ba prelimináriu rezultadu estudu viabilidade no dezeñu nia atubele define katak husi proposta dezeñu hamutuk neen (6) ne'ebé mak atu deside hodi viable atu sai ona dezeñu ba sidade universidade Aileu nian", dehan Ministru Longuinhos hafoin reuniaun ho Primeiru Ministru iha Palásiu Governu, kuarta (22/09).
Iha proposta ne'e iha númeru neen (6) mak passa ona atu lori ba oin hodi halo preparasaun ba sidade universitáriu Aileu nian ne'ebé hein kontratu ho kompaña ba BoQ (Bill of Quantity).
Nune'e Primeiru Ministru (PM), Taur Matan Ruak, aseita proposta iha númeru neen (6) ne'e, atu kontinua Obra sidade universitáriu Aileu nian.
Dezeñu hirak ne'e kompletu ona maibé sei halo faze indiminizasaun ba komunidade sira ne'ebé mak afeita ba fatin ne'ebé mak atu hari’i universidade ne'e.
"Agora ita sei hein iha faze indiminizasaun nian ne'e hotu ita halo livre terenu depois mak iha sei halo primeira pedra depois de ida ne'e ita hala'o ona Obra”, hatutan nia.
Dadus ne'e sei hala'o hela rejistrassun ba komunidade afeitadu, nune'e Governu husu komunidade atu loke sira-nia konta bankária hodi halo referénsia osan indiminizasaun ba komunidade afeitadu sira.
Iha Aprezentasaun rezultadu prelimináriu ne'ebé MESSK aprezenta ba Primeiru Ministru, hamutuk iha dezeñu neen, nune'e Primeiru Ministru no Ministru relevante sira hili entre númeru ikus liu númeru (6) mak aprova hodi halo konstrusaun ba obra Sidade Universitáriu Aileu. (*)