"Ha'u foin mai tinan ida, maibé ha'u mai hasoru loos finalistas kuartu turnu nian, ne'ebé sira ohin halo graduasaun. Ne'ebé, ohin ne'e sira iha kursu haat mak, hetan. Normalmente ita dehan graduasaun, maibé ne'e ita kolokasaun de grau ne'ebé sira mai estuda, akademikamente, bainhira sira hasai kursu ne'e tuir grau. Ne'ebé sira ne'e iha grau Baxarelatu. Ne'ebé, ohin ne'e ami mai koloka grau de Baxarelatu ba estudante sira ne'ebé hasai kursu Emfermajen, Farmásia, Parteira, ho Nutrisaun Dietétika, hamutuk 292 pesoál", dehan Reitór ICS, Domingos Soares, hafoin serimónia graduasaun iha Salaun Eskola Canossa Has-laran, Manleuana, kinta (23/09).
Antes tama iha faze halo graduasaun, graduandu sira ne'e ultrapasa ona prosesu ezame monografia, tuir judisiu iha maiu, hafoin semana ida, nia submete kedas lista finalista sira nian ba Ministériu Ensinu Superior Siénsia no Kultura (MESSK) atubele hetan provasaun no autorizasaun hodi gradua sira.
"Fakuldade Emfermajen iha 153, Nutrisaun Dietétika 22, Parteira 80, e restu ne'e iha hotu famásia nian. Sira ne'e kursu Baxarelatu hotu tanba ICS Dili seidauk hetan lisensa atu bele gradua lisensiadu nian", haktenik nia.
Ministru Ensinu Superior Siénsia no Kultura (MESSK), Longuinhos dos Santos hatete, formasaun ba graduasaun foun sira ho grau Baxarelatu iha área Emfermajen, Farmásia, Parteira no Nutrisaun, ne'ebé sai nu'udár rekursu ne'ebé importante tebes hodi hadi'a kualidade no dezempeñu iha servisu saúde Timor-Leste nian.
"Nune'e, hakarak hato'o ha'u-nia parabéns ba estudante hamutuk 292 ne'ebé ohin gradua ona iha serimónia ne'ebé ita-boot sira ohin hala’o. Katak, ne'e la'ós de'it aktu formal iha vida akadémiku, maibé reprezenta mós tranzisaun ba vida pesoál ne'ebé imi sei aplika hodi dezenvolve ita-nia Paiz, liuhusi koñesimentu no aprendizajen ne'ebé hetan durante iha formasaun akadémiku nian", dehan Ministru Longuinhos.
Entretantu, totál estudante ne'ebé oras ne'e sei ativu iha ICS hamutuk na'in-2873 husi fakuldade haat. (*)