“Motivu inan soe bebé tanba kapasidade finanseiru no razaun fundamentál liu mak sosiedade agora morál ne'e kuran (menus) los tanba haree ba labarik ne'e hanesan buat baibain ida”, dehan nia ba www.tempotimor.com iha salaun Laline Lariguto CNE, Kolmera, kuarta (29/09).

Tanba liuhusi hahalok ne'ebé halo ba oan ho fó domin atu sente no hatudu katak domin ida uluk inan fó mai, ida ne'e mak agora fó ba oan la'ós oan hanesan buat laek ida.

"Ba feto maluk sira ita hotu feto, balun sai inan ona, ita hotu sei sai inan, ita sei sai avó e ita mós sai duni husi inan ida, wainhira ita hanoin soe bebé, ita tenke hanoin ita ida mai iha mundu ne'e sai husi sé, tanba inan ida mak ita iha, se tanba inan ida mak ita iha agradese ba moris inan ida ne'e”, hatete nia.

Bainhira hanoin oan hanesan buat laek ida, ema hotu sei laiha mundu ne'e, no ba feto sira bele iha problema barak, dezafiu mosu oioin bainhira buka atu rezolve hotu ho di'ak no la bele monu hodi deside soe bebe.

“Soe bebe ne'e krime tanba halakon vida labarik ida nian maibé krime ida ne'e, la bele penaliza de'it feto, tanba labarik moris mai iha inan ida aman ida entaun krime ne'e halo husi ema na'in-2, feto no mane”, afirma nia.

Tanba ne'e kazu soe bebé ne'ebé akontese GMPTL sei akompaña organ kompotente Polísia Nasionál Timor-Leste halo hela investigasaun no enkoraja nafatin sira atu halo investigasaun hodi bele hetan sé mak kulpaduba kazu refere.

GMPTL iha tinan 2019, hala'o workshop ida kona-ba kazu soe bebé iha ne’ebé buka espirasaun husi parte hothotu, esforsu beibeik ona atu konsesializa kona-ba dignidade umana ema nian nomós labarik ida nia moris importante tebes ba rai ida ne'e.

Nune'e sira mós halo rezolusaun ida hanesan kampaña ida, "hatete la’e ba infantiasidu" no rezolusaun ida ne'e husu Ministériu kompotente atubele haree halo esforsu ruma oinsá bele redus kazu soe Bebé. (*)