MEJD Apoiu Fasilidade Eskola Ba EBF Tasi Tolu Featured

Tempotimor (Díli) – Ministériu Edukasaun, Juventude no Desportu (MEJD) fó apoiu fasilidade eskola nian hanesan meza no kadeira hamutuk 240 ba Eskola Ensinu Bazika Filiál 1,2 sikulu 12 de Outubru Tasi Tolu.

Ministra Edukasaun Dulce de Jesus informa ba jornalista dehan, eskola refere iha problema kona-ba kadeira ho meza. Tanba ne'e, MEJD servisu hamutuk Ho Rotary Club hodi apoiu ba eskola ne'e.

"Eskola ne'e hasoru difikuldade boot. Estudante sira tuir prosesu aprendijazen tuur iha rai de'it. Ho problema hirak ne'e mak MEJD hamutuk ho Rotary Club fahe kadeira ho meza hamutuk 240 ba eskola ne'e," hatete Dulce de Jesus hafoin entrega fasilidade hirak ne'e, Kuarta (28/08/19).

Ministeriu Edukasaun, tuir Dulce, sei koko nafatin buka solusaun atu rezolve no halo kompleta fasilidade eskola.

Entretantu, embaixadór Austrália, Peter Roberts sente kontente bainhira apoiu kadeira ho meza ba estudante sira iha eskola EBF Tasi Tolu. "Ha'u kontente tebes ohin mai iha Eskola EBF Tasi Tolu hodi partisipa iha seremonia entrega kadeira ho meza 240 ba eskola EBF 1,2 sikulu 12 de Outubru Tasi Tolu," dehan Embaixadór ne'e.

Koordenadora Ensinu Baziku Filial 12 de Outubto Tasi Tolu, Filomea Casimira sente kontente tanba kleur ona mak eskola ne'e infrenta problema. Maibé, ohin eskola refere hetan atensaun husi Ministeriu Edukasaun. Nia mos husu ba Ministru Edukasaun Juventude Desportu atu kontinua tau atensaun ba nesesidade eskola nian.

"Ami iha ne'e presiza aumenta tan sala de aula. Tanba ida iha agora ne'e aula provizoriamente. Iha ne'e sala mak tolu de'it no labele uza tanba kondisaun ladún di'ak, inklui aumenta numeru profesores minimu. Inklui barak seidauk troka mos moru ne'ebé haleu eskola blun komes aat," haktuir koordenadora EBF 1,2 sikulu 12 de Outubru Tasi Tolu.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.