Login to your account

Username *
Password *
Remember Me

Taraleu Haktuir Komandante Daitula Nia Lakon

Komadante Falintil David Alex ‘Daitula’. Komadante Falintil David Alex ‘Daitula’. Foto Espesial

Tempotimor (Baukau)-José António Belo ‘Taraleu’ haktuir Komadante Falintil David Alex ‘Daitula’, nia lakon iha loron 25 fulan-juñu 1997, iha fatin Lie Gali Gau, Kaibada, Munisípiu Baukau.

Iha akontesementu loron 25 fulan-juñu tinan 1997, pur-volta tuku 10:00 oras timor-leste (otl), maibé antes akontesimentu ne’e, Komadante Daitula ba uluk iha Postu Administrativu Kelikai hodi ezekuta orden iha loron 29 fulan-maiu tinan-1997, liuhusi operasaun konsege hamate Militár Indonézia hamutuk na'in-19 no foti kilat ida.

Enkuantu fila husi Postu Administrativu Kelikai liuhusi Kaibada-Makasa'e ho karreta Kabaya tula sira ba hatun subar iha Señor Derok-Masin nia diresaun hodi subar ne’ebá, maibé iha tempu balun de'it obrigatóriu tenke muda sai husi fatin refere.

“Atu subar sa'e ba leten oituan, ami deskuidu kolega ida mate, depois ami tun ba subar iha diresaun Fitil ninia iha eskola Uailili nia leten, ami subar iha ne'eba entre dia 19-20 Juñu, lokraik orden husi komadante alotasaun ami sai husi ne’ebá”, dehan José Belo, iha reflesaun memória Komandante Daitula, Lie Gali Gau, Kaibada, Munisípiu Baukau, sábadu (27/11).

Nune'e kontinua la'o tun fali ba dirasaun Buibau nian mosu fali iha Kaibada-Makasa'e hodi subar, maibé iha loron 21-22 dadersan Komandante Daitula bolu Taraleu hodi observa to'ok dalan ba Kaisidu mosu iha Uai-ono no Bukoli, tanba iha servisu balun ne'ebé mak presiza atu halo.

Maibé iha momentu ne'eba Taraleu mós la hatene fatin la'o oinsá mak bele sai husi ne’ebá mosu iha dalan korta ba Uatabo nian, maibé  Komandante Daitula rasik mak orienta ba maluk ida hodi akompaña Taraleu ba mosu iha Kaibada, iha tempu lokoraik, maluk ne'ebé mak Komandante Daitula haruka la'o ho Taraleu halo kedas observasaun to'o fila ba Kaibada-Makasa'e, maibé Taraleu rasik hela iha Kaibada-Uaimua durante loron 2 halo observasaun dalan ba Uai-ona no atu ba Uai-kua, maibé observasaun ne'ebé mak Taraleu halo iha Kaibada Forsa Indonézia tuun iha fatin refere loron-5 antes halo patida tun depois filafali.

Momentu ne'eba Taraleu fila iha loron-24, parte lokoraik, maibé komadante sira halo'ot ona sasán atu sai.

“Ha'u to'o ba Komandante bolu situasaun oinsá, ha'u informa situasaun katak iha loron lima ga neen liuba tentara tun iha ne'eba depois filafali, oinsá ho Kaisidu ha'u dehan hanesan hotu, oinsá ho Bukoli nian, ha'u to'o ba Badunau leten ba husu populasaun katak tentara la tun iha ne'eba”, konta nia.

Komadante Daitula dehan hein tan Mana Una-boi husi parte Mulia nian, tanba atu ba diresaun Pai L-7 nian, maibé hein to'o Mana Una-boi la mosu, nune'e komandante deside atu subar liuhusi dalan área eis-prizaun Kaisa'e nian la’o liuhusi natar mosu iha tasi hodi subar iha kuak laran.

Bainhira to'o iha fatin refere hamosu preokupasaun, nune'e Komandante rasik bolu Taraleu hodi husu tuir korta dalan boot atu to'o iha diresaun nian lori oras hira, hatan ba kestaun ne'e, Taraleu rasik hatete, se lais liu minutu-30 korta liuhusi estrada boot, maibé liuba sorin lori oras 4 liu.

Tanba fatuk kuak iha tasi atu subar la seguru bainhira tama ba laran mak inimigu deteta hodi para ró taka netik fatuk kuak tiru sai la di'ak, mak deside tenke sai husi fatin ne’ebá.

Nune'e Komandante rasik deside la'o husi fatin refere to'o Kaibada-Uaimua, hodi husu tuir tan servisu husi Manatuto Laklo nian ba kaisa klandestina ida husi parte Manatuto Laklo nian.

“Estafeita ida mai husi Laklo, kolega ne’e ohin sei moris momentu ka'er iha ne'e bapa tesi nia tilun, nia naran João Mau-leki Soares, mate ona mais maun Loke Matan halo nia moris fali iha komarka laran", dehan Taraleu.

Iha Kaibada mós marka tan pontu ida atu realiza enkontru iha halihun ida, hodi tesik ba akadiru laran atu hasoru mós rede balun husi Manatutu nian.

Maibé Taraleu husu komandante atu esplika se mak atu lori ema balun husi Manatutu nian hasoru Komandante, maibé Komandante rasik haruka Taraleu haree de’it servisu.

Nune'e Taraleu hamutuk ho nia kolega ida hodi fila ba uma fó hatene família hodi sosa matabisu dader nian ba sira, maibé sosa matabisu tarde Taraleu fó hatene mós ba nia maluk klandestina Akin, Abilio no José Manúel hodi haree seguransa.

Bainhira tuku 10 oras timor-leste (otl), Taraleu ho Loke Matan tau faru Golkar enkuantu Komadante Daitula tau faru metan, la'o tesik hodi hein maluk sira husi Manatutu nian, maibé la kleur sira husi Manatuto mós to'o iha fatin refere ko'alia kuaze minutu-30 nia laran.

"Ha'u sei rona pai husu ba kolega ne'e, se nu kazu ha'u ba Manatuto ita-boot bele subar ha'u, entaun kolega ne'e dehan ami prontu, tanba husi Laklo kala relasaun ho señor eis sekrétariu rejiaun-3 João Mau-leki Soares, ami ko'alia pur-volta minutu-30 derepente ema haleu ami”, nia haktuir.

Iha momentu ne'eba ema serka hodi tiru, tanba ne'e Loke Matan halai uluk, Komandante Daitula halai husi klaran hodi ba hasoru malu iha fatin ne’ebé termina, maibé to'o iha parte sorin ema konsege tiru kona Komandante Daitula nia liman.

Nune'e Taraleu ho Loke Matan halai liu maibé haree Komandante monu sira na'in-2 mós halai fali ba Komandante Daitula hodi kous lori ba fatuk hu’un, maibé to'o iha fatuk hu'un Bapa sira komesa haleu, Bapa sira mós lakuiñese sira ne'e ema husi ai-laran.

“Derepente señor naran Manuel Ariati membru saka ida nia mak hamrik hatete, ne'e David Alex, no ht ne'ebé mak pai lori ne'e, ami atu monu ba susar ne'e mós at derepente, atu kontaktu ba grupu sira sorin ne'e la di’ak”, nia konta.

Depois iha tuku 12:00 otl Bapa sira obriga Taraleu ho nia maluk sira hanesan Gil Vicente Correia husi Seisal, João Mau-leki Soares husi Manatuto Laklo hodi hi’it Komandante Daitula ba to’o Uatabo tanba nia liman karuk no ain los mak kanek, karreta ida tula lori ba Ruma Merah.

Bainhira to'o iha ruma merah iha Komadante Korem Slamat Sinabuter hamutuk ho Maior Paulos Frederiks Lodeviks nia mak ikus liu Dan Jeng Kopasus iha Komandante iha Rumah Merah Baukau, foin lalais ne'e mós lori fali Komandante Xanana nia kilat mai iha Dili hodi entrega ba Xanana.

"Mai iha Dili, ha’u respeitu ba na’in-ulun sira ha'u lakonsege ba husu autorizasaun, mais ha'u ba palang maior jenerál ne'e, tanba iha momentu ne'eba nia pangkat maior, ha'u husu, ita-boot dehan ha'u-nia aman sei moris ne'e ita-boot husik iha ne'ebé, maibé hatan dehan ami forsa ne’e iha regra”, katak Taraleu.

Bainhira to'o iha Ruma Merah, Bapa sira lori tiha Komandante Daitula, Loke Matan, Mariano da Costa ba Dili, enkuantu Taraleu, Gil no João Mau-leki Soares kastigu hela iha komandu Dang Setorál Lanud-Baukau.

Momentu Bapa sira ne'ebé mak kargu boot iha komandu Dang setorál Lanud-Baukau hanesan Jodi Kusuma no vise Wisnu ne'ebé mak foin lalais sai jenerál iha Indonézia nomós komadante Panda-9 Udayana Bali.

"Ha'u pernah ba hasoru husu informasaun klaru kona-ba pai, nian hanesan responsabilidade ne'ebé hanorin hela atu buka hatene karik nia mate sira hakoi iha ne'ebé", dehan nia.

Tanba iha mosu sinál interogasaun bainhira iha Dang Setorál nia fatin iha loron 27, tuku 3:00 otl, Seramelik no José Bifi mosu hodi fó hatene Taraleu iha kadeia laran, dehan Komandante Daitula nia mate isin lori ona ba Bualale ho elíkoptru.

Tanba orintasaun ne'ebé mak Komandante Daitula fó hela ba Taraleu no nia maluk sira ne'ebé mak hamutuk, lalika temi ema ida nia naran hanesan estafeita no kaisa klandestina.

Livru oan ne'ebé mak Komadante Daitula lori iha laran mak númeru telefone, naran ema ne'ebé mak husi estranjeiru nian nomós ho númeru osan husi klandestina sira fó.

Maibé ba servisu ne’ebé halo iha momentu ne'eba bainhira Komadante Daitula hamutuk ho nia membru sira iha Uailili, haruka Taraleu tun uluk mai Baukau Vila iha Loja Blue Ribbon haruka fax ida ba kolega João Martintus haruka nia fila mai ho Cameraman ida ne'ebé mak brani atu foti filmajen iha kombate nian ba operasaun ne'ebé mak tuir mai.

Komandante Daitula mós la'ós mobiliza ema rai de'it, maibé mobiliza mós ema husi internasionál sira, tanba iha projetu ida bolu floresta, brinqueirus enkuantu projetu ida seluk komadante Daitula bolu Kultura na futuru.

Iha fulan-juñu tinan-1996 komadante Daitula mós estabelese komunikasaun obra ida, ho brinqeirus ne'e mak lori satelite entrega ba lideransa sira uza mai husi Padre Sato.

Projetu seluk ne'ebé mak Daitula hari’i tan mak montanhas haruka osan ba komadante sira iha rejiaun ida-idak, nune'e mós obra ikus kultura na futuru, katak komadante Daitula hari’i eskola iha Darwin no Portugal ba jerasaun foun sira atu hanorin lian Tetun labarik sira.

“Ha'u la mai julga kolega sira ha'u la mai defende ha'u-nia an iha ne'e, ha'u moris ho todan ida ne'e tinan-23 balu liu ona", afirma nia.

Tanba ne’e iha loron 9 fulan-novembru 1998, bainhira Primeiru Ministru, Taur Matan Ruak bolu hikas Taraleu ne'ebe fila husi Indonézia no simu husi komandante Maukana ne'ebé lori ba Manatutu presta deklarasaun ba Komandate Taur atu oho Taraleu hodi hakotu todan ne'ebé mak nia parte lori iha nia moris. Maibé Taur hatan dehan oho Taraleu mós la halo Daitula atu moris filafali

Taraleu ne’ebé durante ne’e tur hamutuk kolega sira hamnasa no kontente, maibé iha minutu-1 nunka haluhan Komadante Daitula iha nis Moris tomak.

Dadaun ne'e Taraleu hahú hakat tuir komadante Daitula nia nia-ain fatin ho obra hahú ona rekolla dadus atu halo livru ida ne’ebé iha ona prosesu nia laran.

Tanba entervista ona veteran na'in-48 ne'ebé mak antigu nian, maibé sei falta na'in-32 atu halo kompleta ba volume dahuluk nian, tanba dokumentu balun komadante Daitula nian iha estranjeiru haruka mai ona entervista ikus ne'ebé mak Komandante Daitula halo iha fulan-marsu.

“Iha momentu ne’eba primeiru ministru mós iha ne'eba, jornalista ida naran Makiu Karne ho Santan Abucer sira husi televizaun ABC", nia konta tuir.

Filmajen ne'ebé mak Taraleu toman, husi vídeo ne'e Komadante Daitula hatete, fiar nia-an, fiar nia povu atu mobiliza povu ba ukun rasik-an. (*)

Rate this item
(17 votes)
Last modified on Monday, 29 November 2021 17:57
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter