Jerente Programa ACbit, Domingas Maria Silva, hatete, sobrevivente husi Munísipiu Baukau ne'ebé rejistu ona iha databasse ACbit pur-volta 200.
"ACbit hetan fundu oin-oin husi doares sira seluk, ne'ebé fó ona apoiu ba feto maluk sobrevivente sira individu no grupu ho totál 314," dehan nia iha salaun apuramentu Baukau, kuarta (18/05).
Benefisiáriu kompostu husi Munísipiu Aileu, Baukau, Covalima, Dili, Ermera, Likisa, Manufahi inklui Oe-cusse.
Fundus ne’e, mai husi Sekretária Estadu Inkluzasuan no Igualidade (SEII), ne’ebé atu halo rotativa osan ba grupu sira no Ministeiru Soliedaridade Sosiál no Inkluzaun (MSSI) ho Sentru Nasionál Chega (CNC-sigla portugés) fó apoiu ba negósiu ki'ik nian.
Alende ne’e, ACbit hetan apoiu seluk husi ajénsia nasionál no internasionál hanesan, Mizerior, Hivos inklui Ajar.
"Iha ne'eba fundus oin-oin ne'e la'os osan direitamente, maibé ami mós apoiu matérial, hanesan mákina suku nian, sasan fa’an kios ki'ik no permakultura ami apoiu ba sira bibit modo sira halo kantareiru rasik, ne'e la'os iha Baukau de'it, ami kobre iha Munísipiu sira," nia afirma
Fundus ne'ebé SEII apoiu ba ACbit hodi fó tutan ba grupu no individu sira ho montante rihun US$3.000.
"Agora dadaun ami hetan fundus husi SEII kada grupu hetan rihun US$1.500, maibé ne'e rotativa, bainhira grupu sira hetan lukru, osan inan ne'e, sira fó fali ba grupu seluk, nune'e osan ne'e la estraga, ne'e mak estratéjia foun SEII nian," nia esplika
Benefisiaria sobrevivente, Antónia das Neves, hatete, antes ne'e fa’an de'it produtu kulu, ne’ebé hetan rendimentu menus, maibé ACbit fó apoiu fini forekeli hodi kuda no fa’an nia rejultadu dadaun konsege rekupera kondisaun ekonomia.
"Sira ACbit fó apoiu mak fini forekeli nian saku rua, ha'u kuda ba fa’an hodi haree ha'u nia oan sira nia eskola, ne'ebé agora ida hetan tiha ona servisu, seluk sei kontinua eskola, nune’e tán forekeli ne'ebé ha'u hetan, sente moris di'ak oituan ona," nia hatete
Entretantu feto sobrevivente no vítima violénsia bazeia ba jéneru ne'ebé ACbit rejistu hamutuk 1.250 kompostu husi teritóriu nasionál. (*)