Tuir informasaun ne’ebé www.tempotimor.com asesu iha pájina MOP, sesta (03/06) katak, Ministru Obras Públikas (MOP), Abel Pires da Silva, akompaña husi Prezidente Eletrisidade Timor-Leste Empreza Públika (EDTL.EP), Paulo da Silva, no Prezidente Autoridade Nasionál Eletrisidade Institutu Públiku (ANE.IP), Ruben Jerónimo Freitas, hodi rona aprezentasaun husi IFC.
Planu kona-ba enérjia renovável hodi responde ba situasaun atuál ne’ebé mundu tomak enfrenta kona-ba folin mina sa’e maka’as iha merkadu internasionál, tanba ne’e, presiza esplora di’ak liután poténsia ne’ebé Timor-Leste iha ba utilizasaun enérjia renovável (Uzina eólica).
Liuhusi enkontru ne’e deside sei asina nota entendimentu (Memorandum of Undestanding-MoU) entre IFC ho ANAS.IP no EDTL.EP hodi halo identifikasaun fatin potensiál sira ba projetu enérjia renovável, tanba ne’e ANAS.IP sei halo estudu ba poténsia ne’ebé iha.
IFC hakarak aselera prosesu identifikasaun hodi hetan dadus ne’ebé kle’an no ho kualidade ba kontinuasaun projetu refere.
Iha ne’e, IFC mós prontu apoiu liuhusi Banku Mundiál ba projetu refere bainhira iha ona estudu ne’ebé kualidade hodi garante implementasaun projetu ne’e ho di’ak.
Enkontru ne’e partisipa mós husi Vise Prezidente EDTL.EP no ekipa husi IFC. (*)