“Imi aumenta imi-nia membru no halo relatóriu bebeik para dadus Estatistiku ne'e klaru ita bele fó apoiu ita bele Ajenda ba tinan 2023 nian”, dehan Elizário iha Suku Bibometo, kinta (07/07).
Tanba ne’e husu ba dirijente sira badinas buka membru sira atubele dezenvolve di’ak liután kooperativa CU Bioni Tumin ne'e.
“Agora ita sei hela fulan-neen (6), agora imi-nia membru hamutuk 16 hahú fulan-jullu ne’e imi lori ema na’in-ida, to'o tinan ne’e hotu imi hetan atusrua-resin (200) no imi mós bele halo proposta ba husu materiál sira”, informa nia.
Nune’e sei apoiu materiál ba kooperativa nian hodi apoiu iha sistema administrasaun nian oinsá fasilita kooperativa CU sira hodi la'o ho di’ak.
Tanba antes atu kria kondisaun ida ba CU ida, dirijente kooperativa sira tenke sakrifika sira-nia fatin ida hodi nune’e SEKOOP apoiu materiál ruma bele rai iha fatin ne’ebé dirijente sira oferese ona.
“Ekipamentu ha’u promete ba imi bele maibé imi tenke iha fatin ida para imi bele rai ekipamentu, buku agora oituan bele bele lori komputadór ne’e nia labele leba loroloron, printer brankas atu tau imi-nia osan”, hatete nia.
Prezidente Kooperativa Bioni Tumin, Jacinto Bobo informa, dadaun ne’e preokupasaun sira ne’ebé hasoru mak, falta sede brankas inklui apoiu formasaun ba membru no dirijente sira.
“Sede brankas, aumenta tan ami ho formasaun sira”, dehan nia.
Iha loron sábadu (09/07) Sekretária Estadu Kooperativa SEKOOP sei fasilita formasaun ba dirijente kooperativa sira hotu iha Pante Makasar-Oekussi. (*)