"Ita iha nasionál ko'alia ona, sé ita hakarak sai husi dependensia petróleo, setór 2 importante ita atu investe, ida mak turizmu, ida mak agrikultura," dehan MPO, José Maria dos Reis, iha Sentru Konvensõens Baukau (CCB-sigla portugés) vila antiga, kuarta (20/07).
Governu mós haree ona, parte leste hanesan Munisípiu Baukau sai fatin ba turizmu hodi atrai turista sira, bainhira dezenvovle ona.
"Baukau sai área turistiku importante, iha turistiku, relijiozu, natureza, ita iha, sé ita ko'alia kona-ba Baukau potensialidade ba turizmu, sá infraestrutura mak ita halo, Aeroportu, halo onisá halo di'ak liu Baukau, dada ema Aviaun boot bele tuun para vizita fatin ne'eba," nia dehan
Sekretáriu Munisípal Baukau, Simão Marques pinheiro, hatutan, parte setór agrikultura no turizmu importante tebes atu Governu halo investimentu, maibé parte Munisípiu Baukau sei falta ékipamentus ba servisu agrikultura inklui infraestrutura.
Husu Governu atu hadi'a infraestrutura, apoiu ékipamentus no finanseiru ba agrikultura atu garante produsaun iha Baukau.
"Ita garante, tanba foin dadauk aprezenta husi servisu agrikultura nian kada tinan ita sempre aumenta produsaun, tanba ne'e tenke reforsa tán parte balun para nia produsaun bele aumenta liután," nia hakotu. (*)