"Ho intervensaun lejizlativa ida-ne’e hala’o ajustamentu ba testu redasaun Dekretu-Lei ne’e, hodi evita dúvida ruma kona-ba se mak benefisiáriu sira husi apoiu sosiál ne’e", Dehan Ministru Prezidénsia Konsellu Ministru, Fidelis Manuel Leite Magalhães iha Palásiu Governu, Kuarta (28/09).
Nune’e reafirma fali desizaun hodi atribui subsídiu ba uma-ka’in sira hotu, ne’ebe halo ona rejistu to’o loron 28 fulan-fevereiru tinan 2022, independentemente husi sira iha situasaun vulneravel ka lae nomos ka husi sira iha membru balu ne’ebe fó atividade profisionál iha ámbitu administrasaun públika nian ka lae.
Ministra Solidariedade Sosiál no Inkluzaun (MSSI), Armanda Berta dos Santos informa, subsídiu fim do ano ne'ebé ho montante US$200 ba kada uma-ka'in ne'e sei lansa iha 16 novembru tinan ne’e.
"Iha 16 novembru sei lansa subsídiu fim do ano US$200 ba uma-ka'in, ita halo fulan klaran, nune’e iha fulan-dezembru bele ramata, tanba buat ne’e liga ho dadus, entaun presiza lansa sedu”, dehan Armanda Berta
Pagamentu ba subsídiu fim do ano US$200 ba uma-ka’in sei iha reklamasaun, entaun hanoin halo kedas pagamentu sedu, nune’e bele haree kestaun hirak ne’e", nia esklarese
Nia informa, daudaun Ministériu Adminitrasaun Estatál (MAE) submete ona dadus uma ka’in 39.110 ba Mnistériu Solidariedade Sosiál no Inkluzaun.
“Ita simu dadus uma-ka’in hamutuk 39.110 ho nia osan ne’ebé prevee millaun US$700. Subsídiu ne’e universalmente katak, uma ka’in hotu-hotu iha territóriu nasionál sei hetan subsídiu ne’e,” nia informa
Entretantu iha dekretu-lei 37/2022, 25 fulan-maiu, kona-ba (Subsidiu de Fim de Ano Aos Uma Ka'in) iha artigu 1 alinea 2 ne’e hateten, subsidiu fim do ano ba uma-ka’in ne’ebé mak vulneravel liu iha Timor-Leste.
Dekretu-lei ne’ebé hanesan, iha fali artigu 2 ne’e, haktuir benefisiáriu ba subsídiu anuál ne’e ba uma-ka’in sira-ne’ebé rejistu ona no iha “Livru Rejistu Uma Ka’in” iha suku ida iha territóriu nasionál previstu ona iha Diploma Ministeriál Númeru 49.2017, 2 fulan-agostu. (*)