Diretór Sentru Solidariedade Sosial no Inklizaun (SSSI) Munisípiu Baukau, Guido Ricardo Belo, informa, Governu liuhusi SSSI, iha loron 12 fulan-dezembru tinan-2022 (ohin) hahú ona levantamentu ba subsidiu fim do anu nian tuir Postu Administrativu.
Nune’e, tuir oráriu levantamentu ba orsamemtu fim do anu ne'e, loron dahuluk ba Administrativu Baukau Villa no Baguia, daruak Postu Laga no Kelikai, ikus liu Postu Vemasse no Venilale.
Postu Administrativu ne'ebé halo ona levantamentu iha loron 12 fulan-dezembru tinan-2022 mak, Baukau Villa no Baguia no BNCTL sei hahú halo pagamentu iha nivél Suku hahú husi loron 13 aban.
"Tuir kalendáriu aban tenkeser halo pagamentu, tuir kaledariu BNCTL iha ne'e (Baukau villa) 11 Suku, Baguia tekniku sira iha ne'eba ona, Xefe Suku sira hein prepara, aban halo pagamentu", dehan nia iha resintu administrasaun Munisípiu Baukau, Segunda (12/12).
Fatin hanesan, Xefe Suku Triloka, husi Postu Administrativu Baukau Vila, Alexandre da Costa, sente kontente ho programa Governu apoiu subsidiu fim do anu ba kada uma kain iha teritóriu laran, tanba objetivu atu hakman sofrementu povu nian no festeza festa natal ho povu.
"Ohin ami foti osan, aban ne'e ami halo ona pagamentu ba benefisiáriu sira iha ami nia Suku ida idak", nia hatete
Enkuantu halo pagamentu iha nivél Suku, involve husi estrutura Suku, membru MSSI na'in-ida, ékipa husi BNCTL, sei hetan seguránsa husi membru Polísia Nasionál Timor-Leste (PNTL) ne'ebé destaka ona iha kada Suku.
Entretantu totál benefisiuáriu ba subsidiu fim do anu US$200 iha Munisípiu Baukau hamutuk 36.438. (*)