Durante observa estrada iha diriesaun refere, Ministru orienta tékniku Diresaun Jerál Estrada, Ponte, Prevensaun, Kontrollu i Seias (DJEPPKS) hamutuk ho kompaña Montana Di'ak atu halo atendimentu emerjénsia hodi fasilita movimentadaun komunidade nian.
“Ne'e ita tenke atende lalais, loke dalan alternativu atu nune'e bele fasilita komunidade”, Ministru orienta tékniku sira bainhira halo observasaun.
Ministru Abel mós husu kompaña sira ne'ebé halo atendimentu emerjénsia entre Gleno ba Ermera vila no Gleno ba Letefoho atu kontinua halo atendimentu nune'e bele fasilita movimentasaun transporte no komunidade nian. Tanba Ministru rasik hakarak kompañia normaliza lalais estrada no ponte ne’ebé kotu hodi fasilita hikas komunidade sira.
Aliende kondisaun ponte sira ne’ebé grave, iha mós estrada iha diresaun refere ne’ebé rai-monu taka estrada maibé daudauk ne’e normaliza ona no bele fasilita ona movimentasaun komunidade nian.
Husi orientasaun ba atendimentu emerjénsia ne’e, Diretór kompañia Montana Di’ak kontaktu kedas nia tékniku sira hodi mobiliza ekipamentu pezadu hodi loke dalan alternativu ba asesu komunidade nian, inklui ponte provizóriu hodi fasilita movimentasaun komunidade.
Iha observasaun ne’e, Ministru akompaña mós husi autoridade sira iha munisípiu Ermera nian. Iha área hirak ne’e estrada grave tebes no ponte ne’ebé kotu defikulta tebes komunidade tanba daudauk ne’e transporte públiku no privadu labele ultrapasa, inklui asesu ba merkadu no ba ospitál no seluk tan. (*)