Tuir informasaun ne’ebé www.tempotimor.com asesu iha pájina MOP, sesta (12/05) katak,, Ministériu Obras Públikas mós planu ona atu loke estrada liga husi suku Fatubesi, postu administrativu Hatulia B, munisípiu Ermera nian ba Loes, munisípiu Likisá nian, tanba ne’e, Ministru orienta tékniku sira atu haree no halo Dezeñu Enjeñaria Detalladu (DED) ba estrada refere.
Ministru Abel hatete, kondisaun estrada liga husi Ermera Vila ba Fatubesi ladún luan entaun defikulta tebes movimentasaun transporte bainhira hasoru malu iha dalan klaran, karreta ida tenke buka fatin para fó fatin ba karreta ida tenke liu uluk.
Nune’e Ministru orienta ekipa tékniku oinsá mak halo luan estrada, aumezmu tempu halo mós manutensaun ba estrada ne’ebé hetan estragus kauza husi udan no rai-monu.
“Sr. Diretór Jerál mak ne’e ita planu husi ne’e tembus Loes, tanba ida-ne’e postu, ida ne’eba mós postu entaun estrada bele liga ba malu. Estrada ida-ne’e konstrui ona (maibé nia luan ladún) entaun ita esforsu para halo luan la’os aspalt mais natón para karreta rua hasoru malu ne’e bele sees, selae araska”, hatete Ministru Abel bainhira hasoru malu ho xefe suku Fatubesi, iha suku Fatubesi, postu administrativu Hatulia B, Munisípiu Ermera.
Ministru esplika uluk (projetu reabilitasaun estrada husi Ermera Vila ba Fatubesi) ita simu ne’e Liurai, tanba osan ne’e osan gratuita, maibé sira mai ho dezeñu hanesan ne’e entaun ita mós simu de’it ona.
Iha fatin hanesan xefe suku Fatubesi, Armando de Carvalho, hato’o mós perokupasaun kona-ba kondisaun estrada no estrada ladún luan defikulta transporte hasoru malu iha dalan klaran. (*)