Tempotimor (Dili) – Timor-Leste presiza investe rekursu umanu liuhosi aumenta embaixadór TL iha nasaun seluk, hodi bele hasa'e vizibilidade Timor-Leste nian iha mundo internasionál.
"Se ita hakarak aumenta ita nia vizibilidade internasionál, ka ita nia jogada iha polítika internasionál hodi proteze ita nia pais, internasionálmente, ha'u hanoin ita tenke investe iha ema. La'ós investe iha projetu. Maibé, investe iha ema," dehan Ministru Negósiu Estranjéiru no Kooperasaun (MNEK), Dionísio Babo Soares hafoin enkontru Konsellu Ministru (KM) iha Palásiu Governu, Kinta (19/12/19).
Governante ne'e fó ezemplu kona-ba nasaun Kuba ne'ebé nia haktuir, riku soin la hanesan Timor-Leste, maibé avansadu tanba sira-nia diplomata iha nasaun seluk, barak.
"Nasaun Kuba ne'e, nia rendimentu la hanesan ita (TL). Mais, ninia misaun estranjéiru ne'e hamutuk 115. Tanba ne'e, mak halo sira nia vizibilidade ne'e maka'as tebes iha mundu. Agora, nasaun boot hanesan Amérika ne'e osan barak. Tanba ne'e, ohin loron ne'e vizibilidade internasionál ne'e importante. Se lae ita izoladu no laiha ligasaun ho nasaun seluk," hatete Dionísio.
Nia afirma, bainhira governu la tau atensaun hodi Timor-Leste nia ligasaun ho mundu internasionál, maka ita sei difikulta ba mudansa ka dezenvolvimentu teknolójia.