Negosiante sira iha merkadu Taibessi tenke pasensia lakon sira-nia rendimentu durante semana rua ikus ne'e hafoin implementasaun estadu emerjensia.
Negosiante ida, Joquim de Jesus hatete, iha situasaun ne'e sasan ladun folin, tanba ema hola laiha.
"Ami faan mós ema atu hola ne'e arraska, tanba moras corona ne'e halo ema tauk hotu, entaun ami-nia modo dala-ruma rai to'o namlaek de'it, tanba ema mai hola ne'e la barak hanesan baibain," dehan Joaquim ba www.tempotimor.com iha merkadu Taibesi, Sesta (10/04/2020).
Negosiante seluk, Maumeta, sente triste tanba modo rai to'o dodok de'it.
"Buat hotu ami halo tuir, maibé ami laran triste mak ami nia modo, tomate oan sira ne'e rai to'o dodok de'it," dehan Maumeta.
Iha situasaun normal, nia dehan, loron ida sira bele hetan rendimentu husi $15 to'o $25, maibé daudauk ne'e sira-nia rendimentu boot liu mak $4.50.
"Agora ne'e la hanesan baibain, agora ami iha ne'e mesak faan sasan de'it, ami mak haree ba malu fali, ne'ebé agora ne'e sorte de'it ema hola," nia dehan.
Tuir Observasaun www.tempotimor.com iha sabado (11/4) portaun entrada no saida ba terminal merkadu nian taka ona no ema sosa nain sira nia kareta labele asesu ba terminal.