Tempotimor (Dili)-Maske governu hasai ona regras Estadu Emerjensia (EE) ba prevensaun Corona Virus Deasses 2019 (Covid-19), maibé sidadaun barak mak la kumpre. Ezemplu ida mak hatudu iha Banku Nasional Ultramarino (BNU).

Tuir observasaun jornalista www.tempotimor.com iha BNU katak, kliente BNU ne'ebé ba foti osan no trata dokumentu la kumpre distansia sosial ne'ebé hatuur iha regras EE.

Kliente sira forma rabat malu hodi hein atu tama ba banku laran.

Parte seguransa BNU nian koko atu fó hanoin, maibé kliente hirak ne'e la preokupa.

Jornalista www.tempotimor.com koko atu konfirma ho responsavel iha BNU kona-ba implementasaun regra estadu emerjénsia, liu-liu kona-ba distansia sosial nian, maibé responsavel BNU lakohi fó informasaun.

Entretantu pesoál seguransa ne'ebé halo seguransa iha portaun BNU hatete, responsavel BNU lakohi ko'alia no husu de'it atu jornalista halo intervista ho kliente sira ne'ebé mai forma.

"Maun ami iha ne'e simu orientasaun de'it, ha'u fó hatene (responsavel) sira, maibé sira dehan bele intrevista komunidade sira iha oin de'it," dehan pesoál seguransa ne'e iha edifísiu BNU, Kolmera-Dili, Tersa (14/04/2020).

Jornalista dada-lia ho kliente BNU ida kona-ba sira-nia koñesimentu ba regras EE, maibé nia parte hateten, hatene duni risku maibé presiza los atu foti osan.

"Ha'u ta'uk kona risku husi Covid-19, maibe tenke mai foti osan hodi uza," dehan nia.

Observasaun jornalista iha terenu, situasaun hanesan mosu mos iha Banku Mandiri iha ne'ebé forma sira nadodon tama hodi viola regra estadu emerjénsia nian tanba laiha distansia entre sira.