Xefe Governu, Taur Matan Ruak hateten, iha fulan-Marsu stock foos sei sufisiénte, maibé iha fulan-Abríl hahú menus tanba ema balun iha osan hola barak.
"Iha Marsu Ministru Koordenador Asuntu Ekonomia (MKAE) dehan foos iha armajen bele augenta to'o fulan tolu ka haat, maibé Abríl ita dehan foos laiha. Tebes, stock foos nia númeru redúz, maibé ne'e signifika família sira sosa barak tau hela iha uma, la'ós hanesan baibain ne'ebé sosa saka ida hotu mak mai fali. Balun ta'uk sosa kedas saka haat ka lima," dehan PM Taur, iha Palásiu Prezidensiál, Bairru-Pité, Sesta (17/4).
Tuir informasaun ne’ebe www.tempotimor.com asesu iha fulan Marsu fo’os iha Armajen mais ou Menus iha tonelada 40 maibe iha fulan ne’e menus ona husi tonelada 20 nune’e parte balun hahu halo proposta atu sosa foos ho osan liu Milaun sanolu resin.
Entretantu iha sorumutuk ohin, Xefe Estadu mós fó hanoin hela asuntu ne'e ba governu para buka dalan.
"Prezidente Repúblika mós alerta hela ida ne'e, entaun ami haree hela dalan, halo nusa mak ita bele kontinua iha kbiit para prepara ita-nia aan ba senáriu ida pior liu," dehan PM Taur.
Xefe Governu ne'e mós konfirma katak, iha tempu besik governu sei foti médida sira ne'ebé bele responde ba situasaun ne'e.