Tempotimor (Dili)- Ministru Agrikultura no Peskas (MAP) Joquim Jose Gusmao dos Reis Martins hatete, tenta jere didiak Orsamentu ho montante 4.9 Milloes ne'ebé aprova ona hodi halo normalizasaun ba irigasaun sira.

 

"Ohin Primeiru Ministru, bolu hau mai atu konsulta kona-ba programa Ministeiru Agrikultura liu-liu preokupasaun situasaun Covid-19 ne'ebé akontese, ita hare seguransa alimentar iha rai laran hanesan preokupasaun, tanba ne'e mak Primeiru Ministru hakarak hatene medidas saida mak halo ona no saida mak bele ba oin halo par bele asegura ita nia alimentar iha rai laran no motiva agrikultor, hakiak nain sira", dehan Nia hafoin hasoru-malu ho Primeiru Ministru Taur Matan Ruak iha palasiu governu, tersa (5/5).

 

Governante ne'e akresenta, Dadaun ne'e Ministeriu Agrikultura no Peskas hato'o hela proposta ba iha fundus Covid-19 nian.

 

"Oras ne'e dadaun ita hatama hela proposta ba orsamentu Covid-19, ne'ebé Ministeriu Agrikultura hato'o ba. Maibe hein dadauk prosesu aprovasaun proposta ita komesa ona mobiliza makina sira, tanba Ministeriu Agrikultura iha makina maizumenus iha neen no hat mak funsiona ho diak hela, entaun ita komesa fahe ona ba irigasaun boot sira liu-liu ba parte leste par halo normalizasaun ba iha kanal irigasaun sira",tenik Nia.

 

 

 

"Tinan tolu ona desde 2017 to'o 2019 ita la iha orsamentu par halo normalizasaun ba irigasaun, ita so halo normalizasaun Emergensia de'it ba irigasaun no foin tinan 2020 mak ita foin tau osan itaun par halo manutensaun ba ita nia gravitasaun irigasaun sira, maibe la konsege liu, tanba ne'e ita komesa halo ona servisu iha kampu Hamutuk ho parseiru sira ne'ebé ajuda orsamentu ituan atu hala'o servisu", Nia esplika 

 

Ministru Agrikultura ne'e ne'e ho optimista esplika, "Orsamentu segunda epoka ba MAP 4.9 Milloes sufisiente no tenta atu jere didiak tanba ita servisu ba segunda epoka, mas atu fo hatene de'it mos katak, 4.9 Milloes ne'e la'os de'it ba segunda epoka, maibe ita mos hakarak fo ajuda ba iha Lojas agrikulturas no asosiasoes ne'ebe mak hamahan ba iha agrikulturas no apoiu mos ba iha transportasaun produtu ne'ebé mak iha situasaun Estadu Emergensia halo transportasaun susar.