Ministru Prezidensia Konsellu Ministru Fidelis Leite Magalhaes hatete, DOT ne’ebé KM aprova atu finansia funsionamentu governu iha fulan Juñu nia laran.

"KM aprova projetu deliberasaun ne'ebé aprezenta hosi Ministru Finansas, Fernando Hanjam, ne’ebé fíksa valór dotasaun orsamentál temporária referente ba fulan juñu tinan 2020, hamutuk dolar Amerikanu millaun $122,3 ne'ebé inklui mós pagamentu ba empréstimu sira," dehan Ministru Fidelis iha Palásiu Governu, Kuarta (03/06).

Nia dehan, valór DOT ba fulan Juñu inklui mós valór osan ba pagamentu Ro Nakroma II.

"Husi valór despeza hirak ne’e, inklui mós dolar amerikanu millaun $3,3 hodi halo pagamentu ba Nakroma II no millaun hitu dolar amerikanu hodi asegura pagamentu subsidiu estraordináriu, ho 60% husi remunerasaun, iha ámbitu médida pakote sósiu ekonómiku hodi fó apoiu ba empregu," Fidelis esplika.

Alende ne'e, nia informa, KM mós aprova ona poposta lei ne’ebé aprezenta husi MF ba alterasaun dahuluk ba Lei númeru 14/2009, loron 21 fulan Outubru nian, kona-ba estatutu remuneratóriu ba Titulár Kargu Politiku sira.

Husi alterasaun ne’e, nia dehan, ba Vise Ministru ka Sekretáriu estadu sira ne’ebé substitui kargu nu'udar ministru hodi ezerse sira-nia funsaun ba periudu Iiu fulan tolu, tenke simu remunerasaun ne’ebé koresponde ba kargu ministru nian hahú husi Ioron ne’ebé hahú ezerse funsaun tuir rejime substituisaun nian to’o nia mandatu ramata.

Diploma ida ne’e, nia hatutan, hahú prodúz nia efeitu iha Ioron ne’ebé governu konstitusionál daualu simu pose.