“Ohin mai enkontru ho sua eselénsia Primeiru Ministru (PM) para orienta ha’u atu fó hatene ba administradór munisípiu no postu sira, inklui lideransa komunitáriu no konsellu suku hotu, para fó apoiu ba ekipa husi MSSI ne’ebé maka hahú tersa-feira (09/06) semana oin realiza pagamentu apoiu umanitáriu iha ámbitu pandemia Covid-19 nian ba ita-nia povu iha suku hotu-hotu ne’ebé la inklui Rejaun Administrativu Espesiál Oekusse Ambeno (RAEOA),” dehan Ministru MAE Miguel Pereira de Carvalho iha Palásiu Governu, Sesta (05/06)
Entretantu ekipa ne’ebé sei ba baze hodi halo pagamentu apoiu umanitáriu hamutuk 452.
“Ekipa sira ne’ebé sei tuun iha baze hodi halo pagamentu apoiu umanitáriu ba ita-nia populasaun sira hamutuk ekipa 452, maibé hasai tiha suku 18 husi RAEOA entaun restu ne’e sei hetan apoiu umanitáriu iha loron ne’ebé MSSI promote ona,” nia dehan
Alende MAE simu orientasaun, PM Taur mós husu ba lideransa lokál sira iha teritóriu tomak atu apoiu ekipa husi MSSI, nune’e populasaun hotu bele hetan sira-nia direitu.
“Eselénsia PM husu ba autoriedade lokál hotu para fó apoiu ba ekipa husi MSSI, atu ne’ebé halo pagamentu ne’e ho di’ak, depois atu garante katak komunidade hotu-hotu bele marka prezensa iha fatin ne’ebé mak ekipa sira sei ba halo pagamentu, nune’e ema hotu ne’ebé iha direitu ba apoiu umanitáriu ida ne’e, bele hetan hotu sira-nia direitu,” Miguel afirma.