Prezidente INSS Longuinhos Armando hatete, subsidiu 60% ne'ebe governu oferese ba kompaña sira atu asegura ninia traballadór simu salariu kompletu durante pandemia Corona Virus Deasses 2019 (Covid-19).

Daudaun ne’e, nia dehan, iha kompaña 160 husi total kompaña 1.213 ne’ebé hato’o pedidu mak hetan ona aprovasaun.

"Kompaña ne'ebé husu governu apoiu 60 porsentu hamutuk 1.213 i agora dadaun prontu ona atu fó apoiu hamutuk 610 ne'ebé prosesu administrasaun klaru hotu ona, no seluk tekniku sira sei halo verifikasaun," dehan Longuinhos liu husi konferensia imprensa iha edefisiu MSSI Kaikoli, Sesta (19/06).

Prezidente INSS ne’e dehan, INSS hato’o proposta orsamentu ba programa ida ne’e hamutuk millaun $11, no ba faze dahuluk Ministériu Finansas foin transfere millaun $7 hodi halo pagamentu ba kompaña 160.

"Komesa ohin ha’u hato'o iha konferensia imprensa nune'e aban ou ba bainrua ami-nia tekniku sira komesa halo ona transferensia, tanba orsamentu kalkulu iha Ministeriu Finansas tranfere ona mai iha Institutu Nasional Seguransa Sosial ninia konta bankaria, entaun ami halo ona prosesu pagamentu," dehan nia.

Aleinde ne’e, nia informa mós katak, NSSI simu ona mós motorist kuaze na’in 900 mak rejistu no daudauk ne’e iha hela prosesu verifikasaun.

Husi total motorista ne’e, Longuinhos dehan, foin motorista 290 resin mak priense kriteiru no seluk sei iha prosesu verifikasaun.